insel air veredicto.jpg

E trahadonan cu a entama un caso contra nan dunado di trabou InselAir a perde nan caso. Esaki pa motibo cu hues ta haya cu e interes di Insel ta prevalece esun di e trahadonan, como cu e situacion financiero di e compania di avion ta hopi precario.

Ayera hues den corte di prome instancia a dicta cu ta berdad cu e compania ta bay contra diferente ley pa keda sin paga e pensioen completo di e trahadonan y tampoco impuesto y prima. Pues e demanda di e trahadonan ta husto sinembargo na e momento aki ta menos importante cu esun di e compania mes, asina hues ta haya.

E compania a bin cu suficiente prueba cu nan ta den problema di likida (no tin cash) hopi serio. Pero hues no ta haya cu ta importante pa e caso awor kico a causa esaki. No obstante cu ta causa pa mal maneho. Esaki segun no ta relevante na momento aki pa bay di acuerdo cu e demanda di e trahadonan. Nan a exigi cu e compania ta cumpli cu tur retraso dentro di 10 dia despues e veredicto y sin cumpli pa impone un multa te un maximo di 10 miyon florin.

Pero hues ta bisa cu ta hopi cla cu Insel awor no por cumpli cu e demanda aki riba termino cortico y den e caso cu corte lo acepta esaki, e compania lo keda cu mas debe. E consecuencia ta cu hasta e departamento di Impuesto lo bin mas duro riba nan lomba mientras awor Insel tin un areglo di pago desde februari.

Otro consecuencianan ta cu un veredicto no faborabel pa Insel lo nifica probablemente cu otro partidonan ta perde confiansa pa haci inversionnan den e compania cual ta necesario pa sanea Insel. Hasta hues ta bay asina leu cu por sugeri un situacion unda e compania ta bay bancarota y asina ni e trahadonan den e caso aki, lo haya nan placa y lo perde nan trabou. Un otro motibo importante pa hues ta cu un situacion asina tambe lo por afecta e compania ruman na Corsou. Asina esaki tambe tin consecuencia grandi pa e pasaheronan di Insel Aruba sea Insel Corsou y asina e vuelonan entre e islanan den e parti Caribe di e Reino, asina hues ta conclui.

Hues ta mustra cu tur esaki no kiermen cu den futuro e trahadonan por haci un otro demanda locual si por resulta den un veredicto positivo. Sinembargo pa awor esaki no ta e caso, teniendo na cuenta tambe cu tin desaroyonan nobo na december awor y januari 2017 cu ta pone e compania den un situacion mas faborabel.

Finalmente e echo cu e seguro di pensioen no ta acepta trahadonan temporalmente mes, tin di haber cu nan ta exigi cu Insel ta cumpli cu su retraso prome. Pero como cu e seguro no ta un partido den e caso, hues no haya esaki un argumento valido di e trahadonan pa cumpli cu nan demanda.

Asina hues ta rechasa e peticion di e trahadonan y condena nan di paga e gastonan huridico.

 

LEAVE A REPLY

Please enter your comment!
Please enter your name here