Interogacion di agentenan policial envolvi den tiroteo fatal cu a cobra bida di hoben A.C. Lanoy a finalisa

Diabierna ultimo Ministerio Publico (OM) a informa cu investigacionnan den e caso “Caret” cu ta trata e tiroteo fatal cu a tuma luga dia 9 di februari 2025 den cual A.C. Lanoy di 19 aña a fayece pa motibo di un tiro di polis a finalisa. ‘Regiezitting’ di e caso lo tuma luga dia 7 di november 2025.

Manera ta conoci dia 9 di februari 2025 Aruba a cay den conmocion pa un caso lamentabel den cual un e hoben Ayden Lanoy di apenas 19 aña di edad a faceye durante un tiroteo cu a involucra dos agente policial.

Segun OM a informa e dos agentenan policial envolvi a bolbe ser scucha como sospechoso y despues di e interogacionnan aki, e ultimo actividadnan di investigacion lo tuma lugar y asina e investigacion lo yega su fin.

Anteriormente ya OM a anuncia cu ambos agente policial lo ser persigui penalmente y lo ser acusa di complicidad di homicidio.

OM a indica cu Landsrecherche ta trahando actualmente na compilacion di e dossier final y asina cu esaki keda cla, e lo ser entrega na Ministerio Publico.

E asina yama ‘regiezitting’ den e caso ta programa pa tuma luga diabierna 7 di november 2025. Durante e tratamento aki den Corte, e abogadonan di e sospechosonan lo haya oportunidad pa presenta nan deseonan di investigacion. Corte lo dicidi siguientemente cual di e deseonan di investigacion di defensa lo keda admiti.

OM a indica cu tanto e abogadonan di e sospechosonan como e abogado di e famia di e victima fayeci a ser poni na haltura diabierna tocante e avancenan den e caso.

Na mesun momento OM a enfatisa cu pa motibo di e seriedad di e incidente den cual un hoben a fayece, e investigacion aki a ser trata cu prioridad door di Landsrecherche. Alabes a subraya cu pa motibo di falta di recurso durante hopi aña door di falta di placa, ta causa cu otro investigacionnan andando a confronta tardansa.

Tabata diadomingo 9 di februari 2025 den oranan di mainta cu un tiroteo a tuma lugar despues di un persecucion automobilistico, caminda e hoben A.C. Lanoy di 19 aña di edad a ser alcansa pa balanan policial, y a fayece. Esaki a hiba na gran emocion y na hopi tristesa cerca su famia y den comunidad completo.

Famia, amistadnan y pueblo a organisa protesta pasivo den nomber di e hoben cu a fayece. E meta principal di e marcha “Justice for Ayden” ta pa pidi na autoridadnan hudicial pa duna respuesta tocante kico a conduci na e suceso lamentabel aki cu a cobra bida di e hoben tata. Na final di e protesta, cu a cuminsa dilanti Corte di Husticia y termina dilanti di Parlamento di Aruba, a entrega un manifiesto na presidente di parlamento e tempo ey, actual minister Gerlien Croes.

E manifesto entrega na presidente di parlamento como tambe na Alto Comisiario Arnhem a pidi husticia pa e hoben Ayden Lanoy y ademas a presenta puntonan cu e grupo di manifestante kier mira cambia den e sistema hudicial pa evita cu un suceso asina lamentabel ta bolbe ripiti un biaha mas. Tanto presidente di parlamento, Alto Comisiario y demas agentenan policial presente a firma e peticion pa sostene e puntonan di cambio presenta den e manifesto aki.

E manifesto a remarca cu ciudadanonan a perde nan confiansa den estado di derecho, y pa bon motibo. E documento a subraya cu e principionan fundamental di e orden huridico democratico, husticia, transparencia y igualdad a ser trapa. Ademas a enfatisa cu te ainda falta contesta crucial tocante e integridad di e investigacion andando riba e sospechosonan.

E manifesto, sosteni pa miles di persona cu a firma esaki, a exigi pa e fiscal publico y minister di Husticia implementa e siguiente medidanan: bodycams obligatorio pa cada agente policial entrante 1 di juli 2025; dashcam obligatorio den tur vehiculo polis entrante 1 di augustus 2025; testnan psicologico estricto cada dos aña pa agentenan policial; publicacion inmediato di e inicialnan di e sospechosonan door di Ministerio Publico; y publicacion inmediato di e acusacionnan contra e sospechosonan door di Ministerio Publico.

Lider di fraccion PPA parlamentario Otmar Oduber na diferente ocasion a pidi pa reunion publico pa trata e topico di e tiroteo fatal y e implementacion di bodycams, y a hasta entrega un mocion na parlamento den cual a duna instruccion na gobierno pa trece solucion structural den sistema hudicial.

E mocion entrega a indica cu e suceso na unda e hoben A. Lanoy di apenas 19 aña a perde su bida den un forma tragico lagando atras un yiu chikito y un famia inconsolabel, ta un suceso tragico cu no por ni mag presenta su mes un biaha mas. Un suceso cu a laga pueblo di Aruba hopi conmovi, y cu alabes a vocifera nan preocupacion y indignacion tocante e proceduranan hiba den e caso aki.

E mocion a indica tambe cu Cuerpo Policial di Aruba, cu tin e trabou di mantene y salvaguardia orden publico pa medio di ehecucion di leynan relevante, tambe a expresa nan lamento pa cu e incidente tragico aki, mester por sigui depende riba e confiansa di pueblo cu nan t’ey pa mantene orden publico.

E mocion a señala cu Cuerpo Policial di Aruba y su sindicato kier mantene y salvaguardia orden publico pa medio di ehecucion di leynan relevante, a expresa di ta desea di tin suficiente instrumento pa ehecucion di un maneho mas efectivo y transparente pa salvaguardia seguridad di e ciudadano pero tambe di e agentenan policial.

Ademas e mocion a remarca cu un grupo grandi di e pueblo ta haya cu tin un falta di transparencia di Ministerio Publico den e maneho di investigacion di e caso tragico.

Teniendo tur e puntonan aki na cuenta, e mocion a duna instruccion na Gobierno di Aruba pa dentro di un termino determina, entrega cu maximo prioridad e leynan necesario yega Parlamento di Aruba pa ehecuta un maneho cu ta inclui, entre otro, “body camera y dashboard camera” mas efectivo, transparente y sigur pa tanto e miembro di Cuerpo Policial como tambe e ciudadania, den mantencion di orden publico.

E mocion a pidi gobierno pa presenta dentro di seis luna leynan necesario na parlamento pa haci drugtest un proceso regular den e Cuerpo di Polis, pa haci un estudio di e necesidadnan pa introduci un seguro (risico verzekering) y asina yama prima di peliger pa e servicio di vigilancia, y por ultimo a pidi pa percura pa un investigacion husto, transparente y imparcial tuma lugar unda comunidad por keda informa y convenci den e obhetividad cu esaki ta tuma lugar y asina reconfirma e confiansa cu comunidad mester tin den su sistema hudicial.

Na final di juni a bira conoci cu finalmente Cuerpo Policial di Aruba (KPA) lo implementa e proyecto piloto di bodycams. Mediante un comunicado KPA a informa cu nan a “scucha e comunidad” y cu hunto cu avancenan tecnologico e organisacion tabata den pleno desaroyo pa ehecuta proyectonan nobo cu ta encera cambionan grandi tanto pa Cuerpo Policial Aruba y comunidad.

KPA a ratifica cu e proyecto aki ta uno piloto den cual polis uniforma lo cuminsa usa e bodycams y por usa e bodycams na cualkier momento den nan ehecucion di nan trabou. E agentenan policial a haya tambe presentacion di e procedura con pa atende cu e bodycams.

Pa loke ta e maneho di imagennan di bodycams KPA a enfatisa cu tin regla y procedura na luga conhuntamente cu Ministerio Publico. No por divulga of mira imagen sin cu tin autorisacion pa cu esaki y esaki ta conta tambe Cuerpo Policial di Aruba pa asina brinda e transparencia y seguridad.