Introduccion di salario minimo pa ora pa 1 di januari 2026

Minister di Labor mr. Wendrick Cicilia (AVP) dia 1 di september 2025 tabata den parlamento pa trata e concepto di ley pa cambia e manera cu ta calcula salario minimo. A aproba e ley aki unanimamente den Parlamento di Aruba. Minister di Labor a determina pa e cambio aki ta na vigor desde 1 di januari 2026.

Cu e cambio aki, e empleadonan cu ta traha 40, 42, 44 of 45 ora pa siman lo bay conoce un aumento den nan salario pa motibo cu e manera pa calcula lo ta basa riba un salario minimo di AWG 11.58 pa cada ora cu un empleado traha.

E formula nobo di calcula salario minimo pa luna lo ta di e siguente manera: ora di trabou pa siman x 11.58 x 4,333. Esaki ta conduci na un salario minimo mas husto y ta elimina e discrepancia cu pa hopi aña tabatin den e calculo di salario minimo.

Minister Wendrick Cicilia tambe a referi na diferente material cu a prepara pa conscientisa pero tambe prepara nos comunidad pa e cambio aki. Riba e website di Departamento di Labor, https://daoaruba.com/index.php/sueldo/ tin un calculator y tambe diferente material den diferente idioma (https://daoaruba.com/index.php/minimumuurloon/) pa informa e dunadonan di trabou y e empleadonan informacion corecto con pa calcula salario minimo.

Ademas Minister Wendrick Cicilia ta referi tambe na un nota di cambio cu ta garantisa cu “Niet Inwonende Dienstbode” tambe ta cay bou di e ley di salario minimo pa ora. Esaki ta nifica cu e empleado domestico cu no ta biba na e cas tambe tin derecho riba e salario minimo pa ora pa cada ora cu traha y e mesun metodo di calculacion ariba menciona ta aplicabel p’e.

“Nos a tuma un stap importante den direccion di igualdad den nos mercado laboral. Cada ora di trabou honesto merece su balor y proteccion, e reforma aki ta percura pa e principio ey finalmente ta refleha den nos leynan. Door di standarisa e calculacion di e salario minimo pa ora, nos ta dunando claridad na e dunadonan di trabou, creando stabilidad pa e trahadonan y un fundeshi di husticia cu ta fortalece henter nos economia”, tabata expresion di Minister Wendrick Cicilia.