Den e delaster añanan nos a tende hopi cu tin “surplus” den ambos cuenta di gobierno y di AZV. Aunke si nos wak pa aña 2035, e “surplusnan” aki lo smelt manera manteca den solo, debi na factornan strategico manera embehecemento di Aruba, y tambe debi na tendencianan geo-economico cu ta cuminsa afecta nos isla tambe.

Na e momento aki, tin un bentana di oportunidad sumamente chikito ainda, unda cu por haci inversionnan strategico cu por yuda brinda oportunidad duradero y strategico pa nos isla. Cu cada dia cu ta pasa e bentana aki di oportunidad ta birando mas y mas chikito. Mi speransa ta cu finalmente nos lo realisa con dificil nos situacion strategico ta como isla, y pa esaki catalisa innovacion berdadero pa yuda salvaguardia Aruba.

Perovskite Solar Factory San Nicolas


 Den e delaster tempo cu a pasa nos a tende hopi tocante San Nicolas y e refineria. Mi ta haya full e discusion masha lamentabel mes, door cu tin alternativanan hopi mas atractivo den terminonan financiero y tambe pa posicion strategico di full e isla. Nos ta toca e tema di Perovskite Solar Factory. Esaki lo ta un fabrica di panel solar di generacion nobo cu lo por produci coriente (LCOE) casi 80% mas barata cu e tarifa di Elmar. Tambe e lo zorg pa un di vunerabilidadnan mas grandi, esta nos importacion di heavy fuel oil, por wordo mitiga en gran parti. En fin, tambe e fabrica tin segun calculacion di ingenieronan di Suisa, un return-on-investment di mas cu 100% (year-over-year), cual kiermen cu e fabrica lo paga su mes back den menos cu un aña di kalender.

Atrobe nos ta wak full un circo politico tocante San Nicolas y e refineria, mientras cu e opcion di e fabrica di panel solar di generacion nobo ta uno sumamente mas atractivo den casi tur perspectiva. Awo un bes mas ta puntra mi mes, dicon esaki no ta hayando e atencion cu e merece cerca e kader politico?

Container Farms.

Un otro obhetivo strategico ta esun di food security, esta cuminda cu por wordo produci riba Aruba mes. Den pasado nos a toca e tema di container farms varios biaha. Esakinan ta indoor hydroponic installation cu ta usa tecnologia hopi sofistica pa por controla e clima paden di e container. Door di esaki den e container por crece cuminda, 365 dia pa aña, y awendia cu tur e tecnologianan avansa cu hopi tiki awa y fertilizer. Tambe e containernan por wordo gestapel riba otro cual ta zorg ervoor cu ta maximisa e uso di tereno cual ta birando mas y mas scars na Aruba. Bezig ta observa tur loke tambe ta pasando den mundo geopoliticamente y nos vulnerabilidad como isla di importacion, e concepto aki sigur merece hopi mas atencion y merito.

AI Medico

Delaster nos por wak e veld medico, cual ta un gasto sumamente grandi pa Aruba y cual ta pronostica pa crece den añanan binidero. Segun cierto academico, tin casi 130 algoritmo di Inteligencia Artificial cu ta FDA-approved actualmente. Den otro palabra, esakinan por wordo mobilisa inmediatamente na Aruba, pa cuminsa e proceso pa automatisa e sector di salubridad.

Debi cu tin escasez masha grandi na specialista humano, gastonan subiendo, y e tendencia cronico di embehecemento di Aruba su poblacion, siguramente AI medico, robotica, e-Health, y nan combinacionnan mester wordo considera cu hopi atencion pa yuda salvaguardia nos sistema di salubridad social.