Ministerio Publico (OM) a informa cu e investigacion penal di e tiramento di 9 di februari 2025, den cual e hoben di 19 aña A.C. Lanoy a perde su bida na man di polis, a termina. Den e contexto aki a manda e citacionnan pa e dos sospechoso y nan defensa pa presenta dia 7 di november den corte pa e regiezitting.
Manera ta conoci, anteriormente OM a anuncia cu lo persigui e dos agente policial cu tabata envolvi den e tiramento fatal. E interogacion di e sospechosonan a tuma luga y a finalisa den luna di augustus y despues di esaki e ultimo actividadnan di investigacion a tuma lugar, te cu awor e dossier a keda cla y a ser comparti.
E agendanan ta ser acusa di complicidad di homicidio y e caso lo ser presenta den Corte den Prome Instancia riba diabierna 7 di november den un asina yama “regiezitting” durante cual hues lo tuma decision tocante e pregunta si tin necesidad pa haci investigacion adicional. E caso no lo ser trata den su contenido riba e dia aki.
Tabata diadomingo 9 di februari 2025 den oranan di mainta cu un tiramento a tuma lugar despues di un persecucion automobilistico, caminda e hoben A.C. Lanoy di 19 aña di edad a ser alcansa pa balanan policial, y a fayece. Esaki a hiba na gran emocion y na hopi tristesa cerca su famia y den comunidad completo.
Famia, amistadnan y pueblo a organisa protesta pasivo den nomber di e hoben cu a fayece. E meta principal di e marcha “Justice for Ayden” ta pa pidi na autoridadnan hudicial pa duna respuesta tocante kico a conduci na e suceso lamentabel aki cu a cobra bida di e hoben tata.
A e grupo entrega na presidente di parlamento como tambe na Alto Comisiario Arnhem a pidi husticia pa e hoben Ayden Lanoy y ademas a presenta puntonan cu e grupo di manifestante kier mira cambia den e sistema hudicial pa evita cu un suceso asina lamentabel ta bolbe ripiti un biaha mas. Tanto presidente di parlamento, Alto Comisiario y demas agentenan policial presente a firma e peticion pa sostene e puntonan di cambio presenta den e manifesto aki.
