(AFP)—Investigadornan Frances ta keda determina pa haya e joyanan imperial horta for di e Louvre na october 2025, un fiscal a bisa AFP.
Polis ta kere cu nan a aresta tur cuatro ladronnan cu a ehecuta e robo atrevido durante dia riba 19 di october, ora cu nan a hiba joyanan cu un balor di casi $102 miyon for di e museo famoso mundialmente.
“E interogacionnan no a produci ningun elemento nobo pa e investigacion,” fiscal principal di Paris, Laure Beccuau, a bisa e siman aki, casi tres luna despues di e robo. Pero e caso ta keda un prioridad haltisimo, el a subraya. “Nos obhetivo principal ainda ta pa recupera e joyanan,” el a bisa.
E diadomingo mainta ey, ladronnan a para un truck di mudansa cu un trapi extensible abao di e Galeria Apollo di e Louvre, unda e joyanan di corona Frances tabata warda.
Dos di e ladronnan a subi e trapi den un lift di mueble, a kibra un bentana y a usa herment di corta metal pa corta e vitrinanan di glas cu tabata contene e tesoronan, mientras cu e otro dos tabata warda abao, segun investigadornan.
Tur cuatro a huy despues riba scooter, cayendo un corona di diamante y esmeralda den nan pura. Pero ocho otro pida di joya—incluyendo un coyar di esmeralda y diamante cu Napoleon I a duna su di dos esposa, Emperatriz Marie-Louise—ainda ta desaparecido.
Beccuau a bisa cu investigadornan ta keda cu mente habri tocante unda e joyanan por ta. “No tin ningun señal cu ta indica cu e joyanan probablemente a crusa frontera,” el a bisa, pero el a agrega: “Cualkier cos ta posible.”
Detectivenan a beneficia di contacto cu “intermediario den mundo di arte, incluyendo internacionalmente”, mientras nan ta sigui cu e investigacion. “Nan tin maneranan pa ricibi señal di advertencia tocante rednan cu ta ricibi mercancia horta, incluyendo pafo di e pais,” Beccuau a bisa.
Tocante si cualkier persona lo presenta pa entrega e joyanan, esaki lo por ser considera como “arepentimento activo, cual lo por ser tuma na consideracion” mas despues durante huicio, el a bisa.
Un di cinco sospechoso, un muher di 38 aña cu ta pareha di un di e hombernan, a ser acusa como complice pero a keda libera bao supervision hudicial mientras cu ta warda huicio.
Investigadornan ainda no tin ningun idea si un persona a haci orden pa ehecuta e robo.
“E ta un hipotesis cu nos tin den consideracion, pero no por afirma esaki mas cu cualkier otro,” e fiscal a bisa. “Nos ta rechasa di tin nocionnan preconcibi tocante kico por a conduci e personanan implica pa comete e robo aki.”
Pero el a bisa cu detectivenan y magistradonan investigativo ta resoluto. “Nos no a bisa nos ultimo palabra. E lo tuma con largo necesario,” el a conclui.
