– Presidente di sindicato IOWUA, sr. Boy Anthony a bisa cu gobierno a enfoca hopi ariba nan mes, sin tene cuenta cu e trahadonan di Valero cu pa añanan ta bin laborando den e refineria aki.
“Si nos no ta haya oido y si bo no ta sinta cu nos y si nos no ta resolve e problema, ami no por garantisa e paz laboral”, el a bisa. E situacion –segun presidente di IOWUA- por bayendo for di man, y e no tin’e mas bou control.
Mientras cu e asuntonan cu ta concerni e trahadonan aki no ta wordo poni preto riba blanco, e por bay asina leu cu menasa di un welga ta na caminda cu consecuencia pa nos pais. Nan a canalisa e preocupacion aki cerca Mediador di Gobierno pa e por intermedia cu Minister di Labor.
Diaranson ultimo sindicato a pidi nan abogado Chris Lejuez pa manda un carta pa gobierno, Citgo, RDA y Valero pa nan sinta na mesa cu e sindicato, ya cu den un tipo di negociacion aki mester tin regla y etica. Tambe nan a percura pa e carta aki yega na Parlamento, ya cu nan ta esunnan cu ta bay trata e ley di Citgo.
E sindicalista a remarca cu apesar cu nan ta un grupo chikito di trahadonan, nan ta realisa un trabou clave pa nos pais por draai. Ya cu si e trahadonan aki ta welga no tin gasolin pa pueblo, ni combustibel pa e avion por bula y tampoco fuel pa Web por produci awa y coriente.
