(AFP) – Iran su negociador top a menasa cu mas forsa como contesta na mas atake di Merca despues cu Teheran a ataca barconan di guera Mericano den e ronda mas reciente.
E intercambio di tiro, cual a cuminsa cu Merca siman pasa, ta bini mientras un blokeo ta andando den e guera di 6 luna entre e dos banda. Iran a mantene su mando strategico riba Estrecho di Hormuz mientras cu Washington ta sigui cu un contra-blokeo di bafnan Irani.
Washington tambe ta buscando causa daño na Iran su economia, poniendo sancion riba entidadnan cu conexion financiero na e republica Islamico como parti di esfuerso pa obliga e pais cumpli cu exigencianan di Merca.
“Mericanonan mester a compronde cu e era di contesta proporciona a yega su fin,” Iran su vocero di parlamento Mohammad Bagher Ghalibaf, ken ta negociador hefe den e dialogo pa caba e guera a comnta.
“Cualkier agresion contra Iran su interes y seguridad lo ricibi un contesta mas intenso, mas doloroso y mas lihe,” el a agrega, den un speech televisa pa media estatal.
Riba diasabra, US Central Command (CENTCOM), cual ta supervisa operacionnan militar di Merca den e region, a bisa cu Iran a exitosamente lansa tiro contra 2 barco Mericano di guera – un cargador di aeronave y un asina yama ‘destroyer’.
Islamic Revolutionary Guard Corps, e brasa ideologico di Iran su ehercito, a bisa cu e barconan a haya nan mes “obliga di bay” despues di “sufri daño,” pero CENTCOM a bisa cu nan a exitosamente evadi e atakenan.
Den contesta, ehercito Mericano a bisa cu el a lansa atake contra 3 tanker di petroleo conecta na e guardianan Irani.
“Despues di Iran su atakenan fracasa, CENTCOM permanentemente a deshabilita IRGC cu cargadornan di petroleo M/T Downy na costa di Kharg Island y M/T Stark 1 cerca di Jask,” CENTCOM a comenta.
“Forsanan Mericano tambe a completamente destrui e cargador di petroleo M/T Kylo… na Estrecho di Oman, atacando e barco den varios posicion critico pa haci esaki inoperabel despues cu e tripulacion a ricibi orden pa bandona e barco.”
Video publica pa CENTCOM a mustra balanan di candela grandi y candela despues cu projectil a dal den e barconan. E 3 barco tabata parti di “un red di multi biyon dollar cu ta financia IRGC y su aliadonan regional,” CENTCOM a bisa.
Iran rapidamente a retalia, cu e guardianan bisando cu nan forsa naval a “ataca 3 tanker di petroleo riba e ruta no autorisa di Estrecho di Hormuz y 3 barco afilia cu matador di mucha Merca den otro areanan.”
El a adverti barconan no purba di transita e caretera maritimo clave via rutanan cu Teheran no aproba. Trempan riba diadomingo Iran su guardianan tambe a bisa cu nan a ataca un drone naval Mericano purbando di drenta e estrecho, segun un declaracion transmiti pa television estatal.
Costo economico mas halto
Comandante di CENTCOM Admiral Brad Cooper a bisa despues di e intercambio di atake: “si bo los tiro na dos i nos barco, nos lo impone un costo economico mas halto – atacanndo 3 di bo.”
Ministerio di Exterior Irani a critica Washington pa e atakenan riba su tankernan di petroleo, yamando esaki “accionnan agresivo y ilegal.”
Un corespondiente pa television estatal di Iran na Jask, den e provincia sur di Hormozgan a bisa cu un di e tankernan ta bashi y cu e di dos ta cargando petroleo. E tripulacionnan tabata transporta pa costa riba botonan di emergencia, nan a bisa.
Otro corespondiente di television estatal na Kharg Island a bisa cu e atake no a laga ningun herido atras.
E administracion di presidente Mericano Donald Trump a purba baha e severidad di e conflicto, cual a comproba di ta cada biaha menos popular na cas mientras eleccion di mita termino ta acercando.
Vice President Mericano JD Vance a te hasta bisa cu e no lo yama esaki “un guera.”
Trump a reitera e punto di bista aki diabierna, yamando e guera “batata chikito” pa Washington.
Iran su hefe di seguridad Mohsen Rezaei a adverti e siman aki cu e republica Islamico a adopta un “strategia nobo” contra Washington cu lo “destrui bo fundeshi.”
Merca ta purbando di aumenta presion riba Teheran pa purba tuma control di e Estrecho di Hormuz, via cual un di cinco parti di e suministro di petroleo mundial anteriormente tabata pasa.
