(AP) — Autoridadnan Israeli a bisa ayera cu un motorista kende un homber arma sospecha di ta Palestino a mata den West Bank tabatin nacionalidad Israeli y Mericano. Esaki tabata e desaroyo mas recien den un ola sangriento di atake violento sacudiendo e region.
Gobierno a identifica e victima como Elan Ganeles, 27, di West Hartford, Connecticut. Un amigo a bisa medionan di comunicacion local cu e tabata bishitando Israel pa un boda y coriendo riba e autopista cerca di Dead Sea na momento cu a tir’e. Ayera ainda no a captura e asesinao.
Ganeles tabata e unico fatalidad di loke ehercito a bisa tabata un racha di tiramento na varios sitio un dia anterior. Ehercito a bisa cu e atacadornan a tira riba un auto Israeli cerca di ciudad Palestico di Jericho, matando Ganeles. E atacadornan, biahando den un vehiculo a core bay y a tira atrobe, segun ehercito. Nan a pega nan propio vehiculo na candela y a huy, dunando inicio na un buskeda.
Ganeles a fayece despues na Hadassah Medical Center, e hospital a bisa. Ta bay der’e awe na e ciudad Israeli di Raanana. Presidente Israeli, Isaac Herzog a extende condolencia na famia di Ganeles.
Ganeles a lanta na West Hartford, yiu di dokternan Andrew y Carolyn Ganeles. El a sirbi den Forsanan di Defensa Israeli di 2016 te 2018, y djey a bolbe Merca pa atende Columbia University, graduando aña pasa cu un bachelor den desaroyo sostenible y neurociencia, segun su pagina di LinkedIn.
Asesinato di Ganeles a yega un dia despues cu un asesino Palestino a mata dos Israeli den nort West Bank, dunando impulso na un accion den cual ocupadornan Israeli a cende decenas di auto y cas na candela na un pueblo Palestino y a mata un Palestino. Tabata e pio violencia den decadas.
Te awo e aña aki, 62 Palestino, como mita di nan afilia na gruponan arma, a keda mata pa trupa y civilnan Israeli. Den mesun periodo, 14 Israeli, tur menos un di nan civil, a keda mata den atakenan Palestino.
