(NLTimes) – Ehercito Israeli a tuma control di e Madleen, un barco cu ta transporta activistanan y un cantidad chikito di ayudo rumbo pa Franha di Gaza, despues di a intercepta e barco den awanan internacional diadomingo anochi. E Coalicion di Flotilla di Libertad, cu a organisa e biahe, ta bisa cu forsanan Israeli a aborda e barco violentamente y sin autoridad legal, segun De Telegraaf. E grupo ta informa cu tur abordo, incluyendo e activista di clima Sueco Greta Thunberg y e capitan Hulandes Mark van Rennes, awor ta den custodia di Israel.

E Madleen a sali for di Sicilia diasabra ultimo cu un carga simbolico di cuminda pa baby, hariña, aros y suministronan medico. E politico y activista Frances-Palestino Rima Hassan a bisa cu e suministronan limita tabata principalmente destina pa yama atencion internacional na e blokeo continuo di Gaza. “Nos kier a tene tur wowo riba Gaza,” Thunberg a bisa e emisora ​​Hulandes NOS prome cu e contacto a bay perdi.

Di acuerdo cu un declaracion emiti dialuna pa e Ministerio di Asuntonan Exterior di Israel, e barco a ser redirigi pa e costa di Israel. E ministerio a bisa cu e activistanan no ta herida y probablemente lo ser repatria pa nan pais natal. “Nan ta celebridadnan cu ta buscando selfie,” e ministerio a agrega, descartando e operacion como un hugada di media.

E Coalicion di Flotilla di Libertad a condena e intercepcion fuertemente. Den un declaracion publica anochi, e grupo a bisa cu e barco a ser “embarca ilegalmente” y su tripulacion civil no arma “a ser secuestra.” E grupo a bisa cu e barco a keda confisca mientras e tabata den awanan internacional y a acusa forsanan Israeli di a confisca e carga humanitario, cu nan a bisa ta inclui productonan cu por salba bida. “E barco a ser aborda ilegalmente, e tripulacion civil no-arma a ser secuestra, y e carga—formula pa baby, cuminda y suministronan medico—a ser tuma den beslag,” e declaracion a bisa.

Mas trempan den anochi, e coalicion a informa cu e Madleen tabata rondona pa dronenan Israeli cu tabata spuit un substancia blanco desconoci. Nan a alega tambe cu e sistemanan di comunicacion di e boto tabata pega y cu señalnan di audio perturbante tabata ser transmiti via radio.

Djis despues cu e contacto a perde, e coalicion a publica varios video pre-graba di e activistanan. Den un, Thunberg ta bisa: “Si bo mira e video aki, nos a ser intercepta y secuestra den awanan internacional door di e forsanan ocupacional Israeli of forsanan cu ta sostene Israel.” Den un otro video, e capitan Hulandes Mark van Rennes ta haci un apelacion directamente na Den Haag, urgiendo e gobierno Hulandes pa “push pa mi libertad y esun di tur otro activista pacifico.”

Minister di Defensa Israeli Yisrael Katz a bisa diadomingo anochi cu el a ordena e militarnan pa evita cu e Madleen ta yega Gaza. Katz a confirma despues cu e operacion a ser realisa y a agrega cu tur activista, incluyendo Thunberg, lo ser forsa pa wak imagennan di e atakenan di Hamas di 7 di october 2023 cu a laga 1.200 hende morto y alrededor di 200 tuma como rehen.

“Ta apropia cu e antisemita Greta y su compañeronan partidario di Hamas mira exactamente ki tipo di grupo terorista nan ta trahando p’e,” Katz a bisa. “Nan mester mira e atrosidadnan cometi contra hende muhe, hende grandi y mucha—atrosidadnan cu Israel ta bringando pa preveni.”

E Coalicion di Flotilla di Libertad tambe a haya critica pa e afiliacionnan di algun di esnan abordo. E activista Brasileño Thiago Avila, kende tabata forma parti di e tripulacion di Madleen, supuestamente a asisti na e entiero di e lider di Hezbollah, Hassan Nasrallah, na Libanon. Segun informe, Avila a describi e figura asesina como un “lider stima,” un “martir,” y un “inspiracion pa hende rond mundo.”

Un otro pasahero, Yasemin Acar di Berlin, a ser informa pa Bild di a celebra e atake di misil di Iran riba Israel na augustus ultimo door di baila den su cushina. Acar ta conoci na Alemania pa organisa protestanan masal contra Israel. Tambe abordo tabatin e politico Frances Rima Hassan, kende anteriormente segun informe a declara cu e atakenan di Hamas di 7 di october a constitui un “acto di teror completamente legitimo.”

Ministerio di Asuntonan Exterior di Hulanda no a emiti un contesta formal ainda riba e apelacion di Van Rennes.