E ciudadano Jacitha Thijsen-Trimon tabata un personahe visibel durante e marcha sindical organisa pa SEPPA y SIMAR y cu solidaridad di SPA diaranson atardi. Sra. Thijsen-Trimon cu brasa habri y cu un bandera di Aruba den cada man, a pidi e dirigentenan sindical pa nan no sigui cu e marcha aki, mirando e crisis cu nos ta aden.

El a declara na Bon Dia Aruba cu “mi lucha ta lucha husto.” E ta haya cu tur esnan cu a forma parti of sostene e gobierno anterior tabatin 8 aña pa goberna. “Actualmente nos ta den un situacion caotico. Nos tin coronavirus. Nos no sa con nos ta para!,” el a laga sa.

El a bisa cu tur e ambtenaarnan a participa den e marcha aki ta cobra overtime na cantidad, sin excepcion. E ta haya cu e marcha aki tabata pa overtime, locual no ta hustifica.

E tin 77 aña y el a bisa cu ta ‘duel mi cu mi ta mira un grupito di hende. Den e momento aki nan tur mester a bin cu un saco di soseishi cu Span bin entrega.’ E no ta haya cu e tipo di accion aki no ta serio sino ‘bla, bla, bla..’’.

E ta lamenta cu e participantenan di e marcha aki no a duna un chens, ni pa e mesun presidente di SIMAR, pa e por papia. Menos mal cu e lider sindical di e maestronan a entrega un manifiesto na presidente di Parlamento, Eddy Thijsen, cu tur nan puntonan.

Na final Sra. Thijsen-Trimon a laga sa cu enbes di bin cu e marcha aki, nan mester ta sinta na mesa. “Na mesa bo ta regla tur asunto bon y malo,” el a bisa.

 

LEAVE A REPLY

Please enter your comment!
Please enter your name here