Ayera mainta dilanti entrada di Parlamento di Aruba, Jayburtt Dijkhoff, presidente di Fundacion SIKI a entrega un carta di rappel na vice-presidente di Parlamento, Muzanin Wever (Futuro). Entrega di e rappel aki ta relaciona cu e denuncia publico cu Dijkhoff a haci algun siman atras contra Minister di Salud, Mervin Wyatt-Ras (AVP).

Dijkhoff a splica cu e motibo cu el a haci entrega di e carta aki ta pasobra despues cu el a haci e denuncia publico contra minister Wyatt-Ras algun siman atras, segun ley, e minister tin tres siman pa duna un contesta pa asina pueblo tambe por mira si e ta cumpli cu transparencia y trece na cla preguntanan clave tocante e maneho di salud publico.

Ayera tabata deadline di e tres simannan aki. Dijkhoff a sigui splica cu el a haci su investigacion y desde 8 di september cu el a tuma contacto cu BID, e minister tin e carta den su poder, pero no a haci mucho pa por duna un contesta. “Ni maske kico e haci awe, e no lo bay cumpli cu e deadline di 4:30. Y asina practicamente nos por bisa cu e ta un hecho palpabel cu minister ta den incumplimento di ley entrante awe,” el a remarca ayera durante su conferencia di prensa.

El a enfatisa cu e hecho aki ta un señal grave pa e democracia di pais Aruba y pa estado di derecho. “Ki señal esaki ta duna pa pueblo cu minister no ta ni cumpli cu e minimo cu ley ta prescribi? P’esey mi ta entrega un rappel tambe na Parlamento di Aruba pa puntra Parlamento kico ta nan opinion tocante e situacion aki, si esaki ta aceptabel conforme nan tarea di controla gobierno y ki señal esaki ta duna pa pueblo, mirando cu si ni un minister ta cumpli cu e normanan di transparencia, basicamente nos ta bisando cu corupcion ta hogando nos dushi pais Aruba,” el a agrega.

Dijkshoff a indica cu el a entrega e carta a base di Constitucion articulo 1.16 cu ta bisa cu tur ciudadano tin e derecho fundamental di entrega un carta na Parlamento. Alabes el a pidi Parlamento pa duna un contesta riba e rappel mas tarda dia 15 di october pa asina “pueblo henter wak si ainda democracia ta biba den e murayanan di Parlamento.”

Ademas di entrega e carta na Parlamento di Aruba, Dijkhoff ta bay entrega un LAR verzoek pa cuminsa cana e caminda legal. El a enfatisa cu esey no ta absolve Parlamento di duna un contesta riba su carta.

“E punto ta cu mi ta cana mi caminda legal pa asina mustra cu un hende por haci un diferencia na pais Aruba. Nos ta bibando den un sistema di tirania silencioso, nos a hereda un pensamento colonialista cu nos no por haci nada, cultura di miedo. A yega tempo pa nos cuminsa papia abiertamente riba e cosnan aki. Si esaki no ta canando bon, nos tin cu papia abiertamente tambe dicon e no ta canando bon, dicon Parlamento no ta haciendo su trabao, dicon minister no ta cumpliendo cu ley. Esaki no ta cuestion di Jayburtt Dijkhof, esaki ta cuestion di nos tur,” el a enfatisa.

Di su banda, vice-presidente di Parlamento, Muzanin Wever (Futuro) a ratifica cu na Aruba ta biba den un estado di derecho y tur ciudadano por entrega carta na Parlamento.

Tocante kico lo pasa cu e carta aki, el a splica cu primeramente mester lesa e carta y wak ki proceso e ta bay cana. Ademas el a indica cu mirando cu carta ta un rappel, mester bay follow up tambe kico a pasa cu e prome carta cu e ciudadano a entrega.

Wever a indica cu den e carta ta bin dilanti un peticion pa eherce un recht van enquête. Pa esaki por tuma luga, el a splica, e mester ta un decision cu henter Parlamento tin cu tuma, pues e ora e tin cu ser treci dilanti na tur e miembronan.

El a splica cu Parlamento mester wak si e caso aki tin e merito pa bay asina leu pasobra Parlamento tin otro derechonan manera derecho di haci pregunta na minister, derecho di interpela cu minister y prome cu un recht van enquête Parlamento mester verifica si e otro pasonan ta bin prome.

Pa loke ta e fecha deadline cu Dijkhoff a pidi pa haya contesta, Wever a splica cu manera ta conoci tin un delegacion basta grandi afo actualmente. Na momento cu full e grupo yega mester dicidi kico ta bira e fecha realmente pa duna contesta.

Pa loke ta e carta mes cu ciudadano Jayburtt Dijkhoff a entrega na Parlamento di Aruba, den esaki e ta haci apelacion urgente pa Parlamento eherce su derecho di investigacion y haci un investigacion profundo riba e maneho di Salubridad Publico.

Den e carta Dijkhoff ta remarca cu dia 8 di september 2025 el a entrega un peticion pa un investigacion preliminar (LOB) na Minister di Salubridad Publico, pidiendo e divulgacion di documentonan di politica pa loke ta trata e acercamento di conflicto di interes y corupcion, of – si e documentonan aki no ta existi – pa splica nan ausencia.

Minister Wyatt-Ras a reacciona a traves di un video riba e peticion di Dijkhoff. Segun Dijkhoff den su reaccion minister a scoge pa desacredit’e publicamente y anuncia un investigacion contra su persona.

“Un Minister mester, mas cu tur cos, actua cu integridad. Integridad ta nifica honestidad, transparencia y cuido debido. Lo contrario ta un minister cu ta comunica opaco, ta defende su mes politicamente cu e recursonan di publico, y ta ataca e mensahero en bes di tuma e mensahe na serio,” Dijkhoff a remarca den su carta.

El a señala cu ley ta prohibi un minister di papia publicamente tocante disputanan laboral y pa medio di su accionnan, segun Dijkhoff, e mandatario a viola e ley (LMA), a kibra e principionan di bon gobernacion y a abusa di su poder.

El a lamenta cu en bes di acudi na dialogo, e Minister a opta pa medidanan duro y a manda Dijkhoff cas mesora, y a neng’e acceso na edificio, sistema, y coleganan. “Tur esaki tabata basa riba un post di Facebook cu facilmente por a ser resolvi pa medio di un combersacion of un acuerdo temporal. Esaki no ta un ehempel di transparencia of integridad, sino di burocracia y abuso di poder na e nivelnan mas halto,” el a expresa.

Dijkhoff a splica den e carta cu desde 2018 el a traha pa mehora cuido medico na Aruba. El a contribui na lantamento di Instituto di Calidad, AruBIG, y Conseho di Calidad. El a remarca cu su esfuersonan a conduci na proteccion di pashent, fortalece proteccion di titulo, y a promove transparencia den gobernacion. “Mi historia ta limpi y verificabel,” el a subraya.

El a sigui splica cu e nucleo di e asunto no ta e, pero e funcionamento di democracia y estado di derecho. “Nos ta mira cu preguntanan di Parlamento regularmente ta keda sin contesta. Nos ta mira cu ciudadanonan cu ta ricibi cuido ta sufri y ta muri den silencio. Nos ta mira profesionalnan ta suprimi nan critica pa miedo di repercusion. E fundeshinan di bon gobernacion ta ser mina door di corupcion y abuso di poder,” el a agrega.

Pro ultimo, den su carta Dijkhoff a haci apelacion urgente na presidente di Parlamento, Sr. Marloon Sneek (AVP) y miembronan di Parlamento pa eherce nan derecho di investigacion y pa haci un investigacion profundo riba e maneho di Servicio di Salubridad Publico.