(AP) – Strea di “The Avengers” Jeremy Renner a ricibi herida serio mientras e tabata limpia sneeuw na Reno, Nevada y ta den condicion critico.
Autoridadnan y e actor su representante no a bisa con e accident aki a tuma luga, sinembargo Washoe County su oficina di cuerpo policial a bisa diadomingo cu Renner mester a ser hiba hospital via helicopter pa ricibi tratamento.
Renner, ken tin 51 aña di edad ta den condicion critico aunke cu e ta stabil segun loke e actor su representante a bisa diadomingo. No a duna mas detaye tocante e extento di Renner su heridanan. Renner a ser herida den un area rond di Mt. Rose Highway, un area cu ta conecta Lake Tahoe y Reno. Renner tin un vivienda na Washoe County, cual ta inclui Reno, y a conta Reno Gazette Journal cu el a scoge e area aki pa motibo cu Reno tabata un ciudad di e size perfecto pa su persona, e tin un bon ambiente y ta permiti e cu su persona bay ski cu frecuencia.
Renner ta e unico persona den e accident segun e oficina di cuerpo policial a bisa den un comunicado di prensa, tambe nan a revela cu nan ta investigando e accident.
Renner ta interpreta e papel di Hawkeye, un miembro di e ekipo di Avengers di e peliculanan y universo di Marvel. E ta un nominado di 2 Oscar, ganando dos premio pa “The Hurt Locker” y “The town.” Renner su interpretacion di un specialista di bom na Iraq den e pelicula “The hurt Locker” a yuda converti su persona den un cara conoci den tur hogar.
E franquisia di pelicula “The Avengers” den aña 2012 a cementa su persona como un parti di Marvel su ambicionnan pa cu storianan y pelciulanan, cu su caracter tumando parti den varios peliculanan di e franquisia y te hasta ricibiendo su propio serie riba Disney + titula “Hawkeye.”
