Desde un edad hoben su amor pa musica a solamente crece. Desde imita su artistanan preferi, te na canta cu bandanan local di Aruba, awor un soño a bira realidad como un di e cantantenan principal di e banda local reconoci Suona. Jessy Alvarado ta conta con su amor pa canta a bira mas cu un hobby y ta haci un meta musical realidad.

Jessy ta conta cu el a cuminsa su trayecto den e mundo di musica desde un edad hopi hoben. Semper e tabata gusta imita artistanan manera Shakira, Thalia y Olga Tañon y tabata hopi bon den esaki tambe.

El a sigui conta cu tempo e tabata na scol basico, e tabata un cantante di reserva pa un grupo di gaita, La Gaita, y a descubri cu el tabata gusta canta tambe y rapidamente su pasion pa canta a crece, pero no solamente pa canta, pero pa ta riba escenario.

Pa loke ta su trayectoria desde cu el a yega Aruba, el a splica cu el a traha den e industria di hotel pa hopi aña y a descubri esaki danki na un programa di karaoke caminda e tabata e anfitrion. Despues el a descubri cu e por a haci mas cu djis canta karaoke, e por canta y presenta, y asina el a haya e oportunidad pa traha na diferente luga.

Despues el a haya e oportunidad pa traha permanentemente pa hopi aña na hotel Riu, hunto cu artistanan local conoci manera Rusty y Reynier. Trahando eynan pa varios aña el a descubri cu su amor pa musica, pa canto, tabata mas cu un hobby.

Pa loke ta retonan cu el a yega di enfrenta, Jessy ta splica cu un di e retonan mas grandi tabata mas cerca di loke el a pensa.

“Un di e retonan di mas grandi semper ta den bo mes, pasobra cada proyecto nobo no solamente ta bini cu e deseo pa logra of e deseo pa haci’e bon, pero tambe cu hopi miedo, y miedo por domina bo. Pues ta e ora ey e proyecto real ta ora bo bira bo mes, ora bo compronde cu bo ta caminda bo ta pasobra bo merece di berdad. Mi ta kere cu esey tabata mi reto di mas grandi, kere y confia y compronde cu oportunidadnan ta bini cerca bo ora bo ta cla pa nan,” el a remarca.

Recientemente Jessy a join e banda local Suona como nan cantante femenino principal, un oportunidad cu ta un stap enorme den su carera musical y ta yega na e momento ideal. El a enfatisa cu e oportunidad nobo aki ta biniendo den su bida aworaki pasobra e ta kere cu e ta e momento corecto y pasobra e tabata cla pa asumi e responsabilidad cu un oportunidad asina ta trece.

“Mi ta encanta e oportunidad nobo aki pasobra nos, e banda Suona, tin un historia hopi bunita, y e ta un proyecto unda nos ta trahando hunto pa crece hunto, pa sigui bay dilanti. Y mi ta hopi contento cu esaki,” el a expresa.

Pa loke ta su metanan, el a conta cu su meta aworaki ta pa sigui crece cu e banda Suona tanto riba nivel musical como artistico y pa sigui desaroya areanan di arte y musica cu kizas e ta descubri awor. Alabes e ta spera cu hunto cu e banda e por tin su propio cancionnan y trece e miho energia, ambiente y musica pa e publico, y trece un tiki mas di e alegria cu musica ta trece pa Aruba.

“Nos ta preparando di berdad pa sali y duna nos miho, pa asina e musica yega tanto na boso curason como na boso curpa pa boso por disfruta di dje. Tin hopi meta, cantica, presentacion, y sigui crece musicalmente. E metanan ta berdaderamente cla manera cristal, y mas aleu di esey, e obhetivo, manera mi ta bisa, ta pa trece alegria y felicidad pa hende,” el a subraya.

Suona ta un banda local reconoci cu ta bay cumpli cuater aña di existencia. E ta un banda cu ta toca hopi ritmonan varia merengue, salsa, bachata, ritmo combina y soca, y tambe tin varios cancion original graba.