(AP) — Joe Jonas a entrega documentonan di divorcio pa Sophie Turner diamars despues di cuatro aña di matrimonio y dos yiu. E cantante di Jonas Brothers, di 34 aña di edad, a entrega e documentonan pa caba cu su matrimonio cu e actriz di 27 aña di edad, strea di Game of Thrones, na Corte na Florida.

 

E documentonan ta bisa cu “e matrimonio entre e partidonan ta kibra ireparablemente.”

Turner y Jonas a casa den un ceremonia secreto na un kapel na Las Vegas dia 1 di mei 2019, despues di e Billboard Music Awards. Duo Country, Dan + Shay a haci un presentacion na e boda. E pareha a haya un yiu muhe, Willa na 2020, y aña pasa a haya un otro yiu muhe kende su nomber nan no a revela publicamente. Jonas ta buscando custodia comparti di e muchanan, segun e documentonan di divorcio. E pareha tabatin un acuerdo pre-nupcial cual Jonas ta spera ta bay cumpli.

Representantenan di Jonas y Turner no a responde inmediatamente pa solicitudnan di comentario.

Ayera, sinembargo, Turner y Jonas cada un a post declaracionnan identico riba nan cuenta di Instagram. “Despues di cuatro aña maraviyoso di matrimonio nos a dicidi mutuamente pa di manera amigable termina nos matrimonio,” e declaracion ta bisa. “Tin hopi narativa speculativo riba pakico, pero realmente esaki ta un decision uni y nos ta spera sinceramente cu tur persona por respeta nos deseo pa privacidad pa nos y nos yiunan.”

E pareha a bisa den entrevistanan cu amigonan mutuo pa largo tabata kier presenta nan na otro tempo cu nan a cuminsa papia riba mensahe directo di Instagram na 2016. Nan a conoce en persona na october di e aña ey, y a cuminsa sali cu otro exclusivamente na december. Nan a anuncia nan compromiso na october 2017.

Turner, kende ta bin di Northampton, Inglatera, a interpreta Sansa Stark den ocho temporada di Game of Thrones riba HBO y tambe Jean Grey den e pelicula di 2016, X-Men: Apocalypse y di 2019, Dark Phoenix.

Jonas, naci na Arizona, a bira famoso cu su rumannan Nick y Kevin den un banda cuminsando na 2005 y un serie riba Disney Channel. Nan a lansa nan di seis album na mei, y actualmente ta den un tour di stadion na Merca.