John Wesley College ta bay cera; studiante y docentenan lo mester bay otro scolnan

John Wesley College, un scol MAVO di San Nicolas cu ta cay bou bao di Stichting Protestants Christelijk Onderwijs Aruba (SPCOA), ta un tema cu tin varios dia den prensa na unda Bon Dia Aruba mes a manda diferente pregunta na minister Croes sin cu a duna un contesta.

Den su ultimo conferencia di prensa, minister di Enseñansa y Deporte Endy Croes a sigura cu despues di cierto combersacion cu SPCOA, ken ta esun encarga cu esaki manera el a sigura, nan a presenta un tabel den un carta unda ta indica e cantidad di alumno cu scol tabata par di tempo pas: “Na 2018 of 2019 ainda e scol tabatin 225 alumno cu bo por maneha un scol ariba dje a traves di ley. Lamentablemente e aña aki nan a habri scol pa 64 alumno,” minister Croes a sigura.

Pa cu esaki, a sigura cu no por maneha un scol cu e cantidad di alumno aki lo cual ta nifica un perdida di placa. E operacionnan no por wanta mas y un posibilidad ta cu nan tin cu subi schoolgeld di aproximadamente 700 florin, cu ta costa awor riba 1.000 florin, “pero sigur ta un decision cu minister no ta forma parti di dje, ta un bestuur di un stichting cu ta maneha John Wesley College y den nan seno nan a dicidi cu esey lo ta miho, pero si nan tabatin cierto condicionnan pa percura pa e 64 mucha haya otro MAVO parti den Filomena College y tambe Abraham de Veer School lo percura pa e docentenan tambe haya un trabou.”

Tabata dia 19 di april cu studiantenan a manda un carta dirigi na minister Croes tocante nan preocupacion pa e posibel ceramento di scol aki y nan a haci un suplica na minister Croes pa por fabor papia cu nan prome tuma un decision final.

Nan tabata sigura cu nan como scol chikito ta un ekipo, un famia, nan a crea diferente red social pa asina scol por haya mas alumno ya cu schoolgeld ta halto y no tur mayor tin e capacidad financiero pa paga e schoolgeld ey.

“Nos ta miembro di conseho di alumno SMAD, Students Making A Difference. E aña aki nos a cuminsa cu e conseho di alumno aki, pa asina nos tambe tin un bos den nos educacion. E motibo di e carta aki ta pa demostra nos punto di bista pakico e scol no mester cera e scol. Nos preocupacion ta cu nos ta sinti nos mes na cas y porfin nos por a adapta un caminda. E cos mas grandi dicon JWC no mester cera ta cu e docentenan t’ey pa bo ‘no matter what’. Nan ta hasta keda despues di scol, den nan ora liber, pa duna nos extra les. Nos ta haya hopi erg cu niun hende a papia cu nos, pone interes den nos, nos tambe tin derecho. Nos, como SMAD, a scucha tur e alumnonan nan preocupacion. Siguientemente Sr. Croes por lesa tur e puntonan di preocupacion cu nos a haya cu nos scol no mester cera,” e documento tabata bisa.