(TMZ) – Johnny Depp su bida tin un sentido nobo despues cu el a gana mas di 10 miyon dollar den su caso di difamacion contra Amber Heard, contando e mundo cu e ta “humildemente gradicidi” e hurado su decision.

Den un declaracion bastante largo despues di su victoria riba diaranson, Depp a expresa cu “6 aña pasa, mi bida, e bida di mi yiunan, e bida di e personanan mas cercano dimi y tambe e bida di hendenan cu pa hopi hopi aña a kere den mi y a sostene mi persona a cambia. Tur den un habri y cera di wowo.”

El a continua contando cu acusacionnan falso y hopi serio a ser poni den su contra via medio, cual a causa un gran fluho di contenido di odio den su contra, aunke nunca a pone ningun cargo den su conrta, y 6 aña despues, e hurado a “dunami mi bida back. Mi ta humildemente gradicido.”

Johnny Depp a ricibi e victoria na momento cu e hurado a declara cu Heard su articulo titula “Mi a papia contra di violencia sexual, y mester a enfrenta nos cultura su rabia” a difama e actor, y a otorga su persona 10.35 miyon dollar como compensacion pa e dañonan causa. Heard a ricibi 2 miyon dollar como compensacion pa e dañonan cu su persona a sufri tambe.

Depp su declaracion a continua bisando cu su decision pa persigui e caso aki, sabiendo cu lo tin hopi obstaculo legal cu e lo enfenta, ademas di e spectaculo mundial inevitabel cu su bida lo bira, a ser tuma “despues di pensa riba esaki cautelosamente.”

Segun Depp, desde comienso e meta di e caso aki tabata di trece dilanti e berdad, sin importa e resultado. “Papia tocante e berdad ta algo cu mi ta debe mi yiunan y tur e personanan cu a sigui apoyami. Mi ta sinti mi mes na pas cu porfin mi a logra esaki.”

Depp tambe a dirigi na su fanaticonan, kende hopi di nan tabata pafo di e sala di corte bisando “Manera for di comienso, te ainda mi ta abruma pa e gran amor y sosten inmenso desde tur parti di mundo. Mi ta spera cu mi lucha pa e berdad yuda otronan, ambos muhe y homber, cu tambe a mira nan mes den mi situacion, motiva nan pa nunca rindi. Tambe mi ta spera cu e posicion bolbe back na ‘innocente te ora cu comproba culpabilidad’, ambos den corte y den medio.”

Tambe el a gradici e hues, e hurado, empleadonan di corte y e cuerpo policial kendenan a “sacrifica nan tempo pa yega na e punto aki,” tambe gradiciendo su ekipo legal kendenan a “haci un trabao extraordinario den yuda mi persona trece e berdad dilanti.”

El a culmina su declaracion bisando “lo miho ta den bin ainda, y un capitulo nobo a cuminsa. Veritas numquam perit. E berdad nunca ta muri.”

Di otro banda, Amber Heard ta bisa cu e resultado di e caso aki ta un “atraso” pa e muhenan cu ta papia den contra di abuso, bisando cu e ta sinti cu el a “perde su derecho di expresa su mes” den e proceso.

Heard a conta TMZ cu e ta “sinti hopi desapunta. Mi curason ta kibra, pa motibo cu e gran cantidad di evidencia no tabata suficiente pa contraresta e poder desproporciona y influencia di mi ex pareha.” El a continua expresando cu e pio parti ta loke e veredicto aki ta nifica pa otro muhenan. “E ta hiba nos back na un tempo unda cu si un muhe tabata papia den contra di algo e tabata bira victima di burla y humiliacion. E ta hiba nos back na un tempo unda cu e idea di violencia contra hende muhe no ta ser tuma na serio.”

Heard ta considera cu e ekipo legal di Depp a logra cu e hurado no a tuma na cuenta e problema clave di libertad di expresion y a ignora e evidencia cu tabata “Asina concluso cu nos a gana e caso den exterior.”

El a conclui bisando cu “mi ta tristo cu mi a perde e caso, pero mi ta hopi mas tristo cu aparentemente mi a perde un derecho cu mi a pensa cu como persona Mericano mi tabatin, cual ta e derecho di papia abiertamente y libremente.”

LEAVE A REPLY

Please enter your comment!
Please enter your name here