(NLTimes) – A haya Joran van der Sloot seriamente herida den su cel na e prison Peruano unda e Hulandes ta cumpliendo su sentencia pa asesinato, extorcion y trafico di droga.
Segun corant local La Republica, Van der Sloot a purba kita su propio bida.
E ministerio Peruano di Husticia a bisa cu guardianan di e prison a haya Van der Sloot herida den su cel mientras nan tabata dunando e prisoneronan desayuno. Empleadonan di e prison inmediatamente a provee asistencia. E Hulandes ta den condicion stabiel pero ta keda bao supervision medico, e ministerio a informa.
Van der Sloot ta cumpliendo un sentencia di 28 aña pa e asesinato di Stephany Flores, ken tabatin 21 aña, den 2010. Den october di 2023, el a haya un sentencia di 20 aña den prison pa extorciona mama di difunto hoben Mericano, Natalee Holloway.
Segun e muhe, Van der Sloot a confesa cu el a asesina su yiu muhe den 2005 na Aruba y a bisa cu e lo bis’e unda pa haya Natalee su curpa si e dun’e placa. Anteriormente den 2023, el a ricibi un sentencia di otro 18 aña den prison pa trafico di droga.
Anteriormente e aña aki, a reporta cu Peru tabata kier manda Van der Sloot e prison notorio CECOT na El Salvador. Joran ta entre e grupo di “prisonero dificil” cu Peru kier a manda CECOT, unda dies miles di persona ta deteni den grupo di hasta 80 den cada cel.
