Condenado Hulandes di asesinato Joran van der Sloot posiblemente lo keda transferi for di Peru na un prison cu mal reputacion internacional y grandi di El Salvador, segun NLTimes a reporta cu De Telegraaf a bisa a base di informacion ricibi pa reportero di crimen John van Heuvel y un carta di e Hulandes.

Peru aparentemente kier manda Van der Sloot e prison, cual actualmente tin 40,000 persona den cel di te 80 persona, conhuntamente cu otro “prisoneronan dificil.”

Van der sloot a keda condena na Peru pa e asesinato di e hoben di 21 aña, Stephanie Flores, den 2010. Den october di 2023, tambe el a confesa na e asesinato di e Mericano Natalee Holloway aki na Aruba den 2005. E confesion aki a dun’e un reduccion significante na su condena y ta anticipa cu e lo keda libera den 2046.

E Hulandes actualmente ta deteni na e prison Challapalca. Sinembargo segun un carta cu el a skirbi y cu Telegraaf a mira segun NLTimes, e ta anticipa di keda transferi na e prison mas fuerte ainda, CECOT, na El Salvador.

Tin critica internacional considerable tocante e condicionnan na e prison enorme CECOT. E clave di El Salvador su strategia anti-crimen agresivo, CECOT ta un mega prison unda bishita, recreacion y educacion no ta permiti y a bira un di e hermentnan mas recien di Presidente Donald Trump su accion contra inmigrantenan.

Bukele a ordena e construccion di e mega-prison mientras e tabata cuminsando su campaña contra El Salvador su gangnan den maart di aña 2022. El a habri un aña despues den e pueblo di Tecoluca, cu 8 pabeyon y por wanta te hasta 40,000 prisonero. E prison aki no ta permiti bishita, no ta ofrece workshop, no ta ofrece programanan educacional pa prepara e detenidonan bolbe sociedad despues di nan sentencia ni tampoco ta permiti e prisoneronan bay pafo. Bukele su minister di Husticia a bisa anteriormente cu esnan deteni na CECOT nunca lo regresa nan comunidad. Aparentemente, algun prisonero ta bao detencion den e mega-prison sin huicio. Algun cel tin te hasta 80 persona sin matras y solamente 1 w.c.

Alcalde Rafael Lopez Aliaga di e capital Peruano Lima actualmente ta na El Salvador. Segun media di Peru, e ta anticipa di firma un acuerdo cu e gobierno di El Salvador tocante e transferencia di prisoneronan Peruano. “Nos kier pa e criminalnan aki experiencia kico un prison real ta,” Aliaga a conta Media Peruano.

Esaki ta principalmente involucra criminalnan serio di e gang Venezolano, Tren de Aragua. Sinembargo segun media, e lista tambe ta inclui varios “prisonero dificil.”

Van der Sloot posiblemente ta entre e nombernan aki.