Awe Aruba ta haya un gobierno nobo, Gabinete Wever-Croes 2. Un gobierno consistiendo di 8 minister. 4 minister cu a sirbi caba den GabineteWever-Croes 1 y 4 caranobo. Bouliderasgo di Minister President Evelyn Wever-Croes.

Ken ta Evelyn Wever-Croes?

Evelyn (54) ta casa cu Kenneth Wever pa 30 aña, ta mama di 3 yiu, Christine, Kevin y Claudine y wela di un nieto, Trystan.

Evelyn ta yiu di Mechy y Dick. Mechy a traha den enseñansa. Ultimo añanan Mechy ta dedica na musica y e Coro Crystal, cu por cierto ta cuminsa bek, despues di a tuma un pausa. Dick ta abogado pa casi 55 aña, na e momento aki e abogado cu mas aña di experiencia na Aruba.

Evelyn a cuminsa studia medicina na Costa Rica despues cu el a caba su VWO na Colegio Arubano cu 17 aña. Pero lihe el a realisa cu su passion no ta den medicina si no riba e area legal y asina a cambia di estudio, siguiendo pasonan di su tata y a specialisa den ley fiscal (belasting). Evelyn a obtene su titulo di “Meester in het Fiscaal Recht” na edad di apenas 22 aña na Rijks Universiteit Leiden y a bolbe Aruba mesora pa cuminsa cu su carera professional na aña 1989.

El’atraha 13 aña na Departamento di Impuesto, 9 aña como hefe di e departamento. Na aña 2003 Evelyn a haci e cambio pa sector priva y a traha 7 aña como consehero di belasting y como abogado. Su experticio riba tereno di belasting semper el a traspasa pa otro y a duna varios curso riba e tereno aki, siguiendo pasonan di su mama.

Na aña 2009, riba invitacion di Lider di MEP Nel Oduber y riba insistencia di su omo Rudy Croes, Evelyn a subi lista di MEP y a wordo scogi cu voto preferencial den Parlamento di Aruba. Na aña 2011 durante un Congreso di partido, Evelyn a wordo eligi como Lider di MEP cu un gran mayoria di voto. Asina Evelyn a bira e di tres lider di partido MEP despues di fundador Betico Croes, den feliz memoria, y Nel Oduber. E prome lider femenino di partido MEP.

Despues di eleccion 2013, Evelyn a keda eligi un biaha mas vu voto preferencial den Parlamento. Asina a completa un trayectoria di 8 aña den Parlamento.

Den eleccion 2017 partido MEP a crece na 9 asiento pero no a sali e partido mas grandi. Sinembargo e partido mas grandi no kier a forma un coalicion. Evelyn a wordo nombra formador e ora.

Dia 17 november 2017 Evelyn a huramenta como e prome Prome Minister femenino di Aruba y a ocupa e function ey te cu awe. El’a enfrenta hopi reto y sin duda esun mas grandi tabata e crisis di Covid. Evelyn a demostra liderazgo firme combina cu empatia, husto e liderazgo cu Aruba tin mester.

Dia 30 di maart 2021, el’a baha gobierno despues cu e partner den coalicion, POR, a hay einvolucra den un investigacion penal.

Elecciondia 25 di juni 2021 a duna e resultado desea pa Evelyn: victoria pa su partido MEP. No solamente el’a haci di MEP e partido mas grandi bek, sino el’a bira e votegetter di pais Aruba cu 7.518 votos. Evelyn a wordo nombra formador un biaha mas y despues di un proceso di formacion extenso, den cual a reuni cu 115 stakeholders, a forma un coalicion cu partido RAIZ. Awe nos ta bay mira su huramentacion como Minister President den GabineteWever-Croes 2.

LEAVE A REPLY

Please enter your comment!
Please enter your name here