Recientemente e Colegio di Supervision Financiero di Aruba (CAft) a publica su conseho riba e proyecto di Ordenansa Nacional pa modificacion di e presupuesto nacional 2025 (OBW) y e voorjaarsnota di Aruba, cual nan a ricibi dia 29 di april 2025. Den e conseho cu nan a manda pa minister di Finanzas, Asuntonan Economico y Sector Primario Geoffrey Wever dia 13 di mei, nan ta duna un splicacion detaya y un substanciacion cu cifra.

Den su conseho CAft ta remarca cu e hecho cu e prome OBW – di acuerdo cu añanan anterior – ta ser presenta den primavera, ta positivo. E Colegio ta indica cu e modificacionnan den e OWB, compara cu e presupuesto stipula pa 2025, ta limita y no tin influencia riba e saldo di financiamento.

Den e OBW, CAft ta splica, e surplus financiero di e sector colectivo ta keda riba 2,4% di e producto nacional bruto (bbp), loke ta nifica cu Aruba ta cumpli cu e norma presupuestario di e saldo di financiamento di como minimo 1% di e bbp y cu e compensacion di deficit prescribi.

E OBW, e Colegio ta sigui splica, ta mustra cu varios di e recomendacionnan duna pa CAft no a ser implementa ainda. Principalmente e desaroyo multianual di e gastonan di personal y e ratio di debe di e sector colectivo no ta keda suficientemente cla. Banda di esaki, tensionnan geopolitico y incertidumbrenan economico ta riesgonan real pa turismo. Den e marco di e incertidumbrenan aki, CAft ta conseha pa keda monitorea di cerca e impacto di desaroyonan economico riba e finanzas gubernamental, y pa reporta tocante di esakinan.

E Colegio ta indica cu e modificacionnan compara cu e presupuesto ta limita y no tin influencia riba e saldo di financiamento di e sector colectivo. E ingresonan cu ta resta ta aumenta cu AWG 7 miyon pa motibo di e recepcion di recursonan di Hulanda. A otorga e recursonan den e marco di e Landspakket, y nan ta destina entre otro na e renobacion di e Korrectie Instituut Aruba (KIA).

CAft ta señala cu na april di 2025, e Departamento di Asunto Economico, Comercio y Industria (Directie Economische Zaken, Handel en Industrie – DEHZI) pa medio di un calculacion preliminar a reduci e crecemento economico cu 0,7% di e bbp te 3,2% y no a modifica e ingresonan presupuesta a base di e estimacion aki.

Den e marco aki, e Colegio ta subraya, ta importante pa tene cuenta cu e tensionnan geopolitico reciente y e incertidumbrenan economico, cu por conduci na un posibel bahada di turismo den e di dos mita di 2025. Considerando e vinculo fuerte entre turismo y crecemento economico, riba termino esaki por tin consecuencianan negativo pa e ingresonan. Den e contexto ey, CAft ta haya esencial pa monitorea mensualmente si e realisacionnan ta desvia di e calculacionnan (presupuestario).

Banda di e saldo di financiamento anticipa di e pais mes di aproximadamente AWG 78 miyon, 1% di e bbp, CAft ta indica cu cerca e otro entidadnan den e sector colectivo – principalmente Algemene Ziektekostenverzekering (AZV) y Sociale Verzekeringsbank (SVb) – ta anticipa un surplus di aproximadamente AWG 114 miyon, 1,4% di e bbp. Considerando entre otro e incertidumbrenan economico mundial, e Colegio ta enfatisa cu e surplus aki por sirbi manera un buffer pa absorbe posibel resultadonan negativo inespera. Den e marco ey, ta importante pa pais tin acceso efectivamente na e recursonan aki.

Anteriormente, CAft a conseha pa yega na palabracionnan cu AZV y SVb mas pronto posibel pa por emplea e surplusnan cerca e entidadnan aki pa reduccion di debe, teniendo na cuenta e rekisitonan legal tocante di tenemento di reservanan den e fondonan social. Recientemente, gobierno a pidi CAft pa expresa su punto di bista tocante di e topico aki, riba cual CAft a indica e ta dispuesto pa duna un conseho mas detaya den e marco aki.

Pa loke ta trata gastonan di personal, CAft ta splica cu desde 2027 e gastonan di personal mester keda bao di e limite di 10% di e bbp. Den 2024, e gastonan aki tabata yega te aproximadamente 8% di e bbp, sinembargo, e Colegio ta remarca, ainda falta un calculacion multianual di e gastonan di personal.

CAft a pidi gobierno pa den e prome presupuesto complementario di 2025 presenta e desaroyo di e gastonan di personal conforme e definicion di e Ordenansa Nacional di supervision financiero temporal di Aruba (Landsverordening Aruba tijdelijk financieel toezicht – LAft), pa por evalua si e maneho existente ta cuadra cu e marconan estableci den e contexto aki. CAft a subraya cu desafortunadamente, e informacion aki ainda falta den e OBW.

CAft ta indica cu a base di noticianan reciente, entrante 1 di mei 2025 Hulanda lo implementa un aumento di interes riba e prestamonan pa sosten di likides di AWG 916 miyon. E Colegio ta señala cu no a inclui e desaroyonan aki den e OBW, y falta tambe un splicacion mas detaya tocante di e posibel impacto presupuestario di esakinan.

Pa 2025, CAft ta constata un nivel di inversion di AWG 70 miyon. Nan ta indica cu por lo pronto, no ta cla di ki manera lo duna forma concreto na esaki. E Colegio ta splica cu si ta bin resulta cu e surplus di 2,4% no ta suficiente como buffer, ta considera pa baha e inversionnan.

Sinembargo, CAft ta enfatisa cu control di gastonan ta preferibel riba reduccion di inversionnan. Den e contexto aki, e Colegio ta remarca, ta importante pa elabora un agenda di inversion multianual. Nan ta señala tambe cu gobierno a priminti cu lo elabora e agenda di inversion multianual aki, pero e no a ser inclui den e OBW ainda. CAft ta considera necesario pa presenta e agenda di inversion multianual priminti mas pronto posibel, pa garantisa e eficacia y efectividad di e inversionnan proyecta.

CAft ta anticipa cu na fin di 2025, e debe di Aruba lo aumenta te 71% di e bbp. Sinembargo, e ratio di debe aki solamente tin di haber cu e debe di e pais, no cu esun di henter e sector colectivo. E Colegio a indica cu ainda no a determina e composicion di e sector colectivo pa 2025. P’esey, nan no por evalua di ki manera e posicion di debe lo desaroya riba termino largo. CAft ta enfatisa cu ta di sumo importancia pa determina e composicion di e sector colectivo riba termino cortico.

Pa loke ta e siguiente pasonan cu CAft ta recomenda gobierno pa tuma, e Colegio ta pidi gobierno, prome cu manda e OBW na parlamento, pa duna substancia na e recomendacionnan inclui den e conseho emiti tocante e amienda y e presupuesto. Esaki ta inclui presenta den e OBW e desaroyo multianual di e gastonan di personal conforme e definicion di e LAft, yega na un agenda di inversion multianual mas pronto posibel, adapta na e capacidad di ehecucion di e pais, y determina e composicion di e sector colectivo cu urgencia, y a base di esaki, pa presenta e desaroyo multianual di e debe di henter e sector colectivo.