Un di funcionnan mas cardinal di un pais su ultra-kader, ta di comunicacion. Nos ultra-kader cu ta mas studia intelectualmente y como resultado por wak mas leu tin cu visualisa y comunica berdadnan intelectual cu pueblo den maneranan cu un persona averahe lo compronde. Pero nos ta wak cu e funcion aki ta fayando den manera severo. Den un comunicado di prensa, parlamentario Jennifer Arends-Reyes di AVP, ta indica cu turismo den aña 2025 lo ta stabiel y literalmente no lo tin caida di turista di Estados Unidos di Merca compara cu 2024.

OK, te hasta IMF y OECD a downgrade nan guia pa crecemento macro-economico di Merca. Aunke tur hende den sector financiero a-politico manera Investment Banking y Hedge Funds ta hari ora IMF y OECD publica nan proyeccionnan politiek-getint demasiado rooskleurig. Pero te hasta e institucionnan aki, combina cu analisis mas neutral di Investment Banks, cual lo elabora riba dje den e siguiente seccion, ta mustra cu economia di Merca ta cuminsa slow den manera hopi duidelijk.

Con por ta cu turismo di Aruba lo keda stabiel den 2025? Atrobe esaki ta pone mi pensa si ta incapacidad intelectual of politieke factoren of mas probabel e combinacion di dos aki. Cu nos ultra-kader, no ta papiando e berdad cu pueblo.

Economia di Estados Unidos ta mustrando Stress Severo

Usando data y analisis di Investment Bank Nomura, e team di analista bou Jordan Rochester, ta bin na e conclusion cu e economia di Merca ta enfrentando un cocktail di “Stagflation”, esta un economia unda crecemento ta slow y na mesun momento inflacion ta hisa. Esaki a cuminsa wordo ilustra den e datonan macro-economico di mas recien.

Den nan rapport mas recien e team di Nomura, ta tuma nota di e encuestanan di Banco Central Americano, di New York, Dallas, y Philadelphia, unda por wak hopi obviamente cu e trayecto economico a cuminsa cay. Na mesun momento usando data di ISM “forward prices paid”, ta mustra cu inflacion mas halto siguramente ta na caminda.

Nos mester nota cu mi persona pa mas cu 2 aña a prognostica un situacion macro-economico ‘stagflationary’. Lastimamente, nos ultra-kader local no a tuma e advertencianan aki na serio, y awo nos como isla lo sufri e consecuencianan di e negligencia hopi severo aki.

Actonan di Desesperacion pa reenforsa Aruba su Divisanan

Den weekend di Hemelsvaart Dag, nos a tuma nota di un bekendmaking oficial di Banco Central di Aruba (CBA), yama “Publieke bekendmaking inzake verdere liberalisatie kapitaalverkeer”. Den e comunicado aki CBA, ta anuncia cu nan ta hasie mas facil pa divisa drenta Aruba.

Awo esaki ta puro speculacion di mi banda, pero si no tin ningun problema cu Aruba su Reserves Monetario, cual nos mester nota cu ambos CBA y te hasta Minister Geoffrey Wever a indica publicamente den Parlamento, dicon ta tuma un accion asina? Den mi opinion esaki ta mustra, cu den background tin en berdad mas preocupacion pa e tema aki, cu nos ultra-kader local lo desea di mustra.

Tambe, kier nota den manera publico hopi duidelijk di e idea, pa nos fondonan di Pensioen local cumpra Aruba su staatsobligaties den Florin Arubiano pa 5%, ta uno sumamente peligroso mes. Dicon mi lo cumpra un staatsobligatie local di un pais cu ta 1 nivel riba di ta un Junk Bond, tuma e posibel currency risk grandi di un obliglatie di Florin y tur e risico aki pa 5% so?

Ban nota hopi hopi duidelijk cu kier motiva nos fondonan di pensioen pa inverti den e situacion net splica den e alinea anterior. Esaki no ta un tema filosofico intelectual, pero algo cu nos lectornan mester realisa cu por afecta nos den maneranan profundo mes. Basicamente kier “gamble” cu nos delaster spaarpot, esta NOS PENSIOEN. Ban pensa hopi bon over esaki.