(AFP) – 3 persona a fayece despues di un brote sospecha di hantavirus abordo di un cruise ship nabegando entre Argentina y Cape Verde.
Te cu awo, un di e caso di e virus posiblemente mortal a keda confirma, segun World Health Organization, cual a enfatisa cu e riesgo na e publico ta keda abao. Sinembargo, e brote sospecha a trece dilanti pregunta tocante si e virus, cual normalmente ta plama via contacto cu cierto bestia, ta plamando via ser humano cu ta contagiando otro.
Hantavirus, ta un malesa cu ta circula den bestia. Operador di e cruise ship Oceanwide Expeditions a confirma cu e ta lidiando cu “un situacion medico serio” abordo di e barco.
Actualmente, no tin medicamento pa combati hantavirus, cual ta nifica cu tratamento ta consisti solamente di purba alivia e sintomanan. Sinembargo Virginie Sauvage, e hefe di Francia su National Reference Centre for Hantaviruses, a conta AFP den un entrevista cu identifica e variante specifico lo provee un bista crucial den loke a sucede riba e barco.
Con comun hantavirus ta?
E virusnan aki ta haya rond di henter mundo, cu infeccion tumando luga henter aña. Por ehempel, China, Rusia y Corea di Sur a reporta varios miles di caso pa aña.
Den Americas, Finlandia y Francia, tin centenares di caso anualmente. Solamente cierto variante di hantavirus ta haya exclusivamente den bestia – manera raton y djaca – cu cual ser humano por contagia.
Con peligroso nan ta?
Hantavirusnan ta parti den 2 grupo: virus for di mundo bieu (Europa, Asia, Africa) y esnan di umndo nobo (Norte, Centro y Sur America).
Pa e virusnan di mundo bieu, e tasa di mortalidad por ta te hasta 14%. Sinembargo, den nacionnan desaroya manera Francia, casonan fatal ta extremadamente incomun y ta afecta primeramente esnan cu tin condicion di salud existente.
Algun caso no tin sintoma of ta limita na dolor di curpa, dolor di stoma y un tosamento level. Sinembargo casonan poco comun por inclui problemanan di higra cu por desaroya den problemanan mas severo pero cu tin solucion.
Den contraste, e mortalidad di e virusnan di mundo nobo pro surpasa 40%. E casonan aki rapidamente ta plama pa e pulmon, causando problemanan pa hala rosea y den cierto caso problema di curason.
Cua ta e tratamento?
Mientas mas trempan hende haya tratamento, miho posibilidad nan tin.
Pa motibo cu no tin un tratamento specifico pa hantavirus, na luga di esey dokter ta purba di maneha e sintomanan. Si e virus ta afecta pulmon severamente, terapia di oxigeno den un unidad di cuido intensivo por ta necesario.
Esnan cu ta traha den industria particular, manera agricultura, ta particularmente den riesgo.
Manera cualkier infeccion, esnan den riesgo mas eleva ta esnan di edad avansa, esnan cu tin un sistema inmunologico mas debil y esnan cu tin problema di salud existente.
E ta contagioso?
Te ainda ta desconoci si ta trata di un brote di e virus Andes. Esaki ta e unico variante pa cual tin caso confirma di contagio di ser humano pa ser humano, sinembargo esaki ta rekeri contacto cercano y prolonga – por ehempel, dentro di un famia.
Ser humano ta primeramente infecta pa medio di inhala spray contamina pa e scupi, excremento of urina di bestia of via contacto directo cu nan excremento, mordi of rasca.
Pa e cruise ship, tin dos scenario posible: contagio di ser humano pa ser humano of infeccion isola prome cu hende a subi abordo, por ehempel si nan tuma un biahe hunto.
Kico e secuencia di e virus por revela?
Secuencia di e virus di un pasahero infecta riba e barco por identifica ki variante di hantavirus ta involucra.
Pa motibo cu e barco a sali for di Ushuaia na Argentina, e virus Andes ta sospecha pa motibo cu esaki ta circula na e pais.
Sinembargo, si ta trata di un variante diferente di e mundo nobo, por ehempel esun yama Sin Nombre, cual ta circula solamente na Norte America, contaminacion na Sur America por keda descarta.
Si un hantavirus di e mundo nobo ta contagia entre ser humano riba e barco, esaki lo ta algo cu antes no a mira.
