Diasabra den oranan di atardi a tuma luga e evento di ‘kidpreneur bazaar’ riba Plaza Daniel Leo. E evento aki a wordo organisa pa Idea (Iniciativa pa Desaroyo di Emperesa Arubianno) cu e meta pa desaroya e idea di muchanan y duna nan e oportunidad di ta comerciante pa un dia.

Louella Croes, trahado di Economishce Zaken den e unidad di Idea, a splica cu e kidpreneur bazaar a cuminsa cu un proyecto pa muchanan for di aña 2018 pa e kidpreneur cu ideanan grandi.

E ta un proyecto cu ta wordo duna na tur e traimerdianan na Aruba y durante e proyecto e muchanan a haya diferente tayer den diferente ramo, manera agricultura, innovacion, canto y baile, pintamento entre otro pa asina siñanan cu algun dia nan por traha algo cu nan por bende.

Croes a sigui splica cu cada aña despues di e proyecto ‘kidpreneur with big ideas’ na e traimerdianan, nan a organisa e kidpreneur bazaar den fin di aña pa nan. Duurante full e aña cu nan a haya workshop nan por a prepara nan producto pa bende na e kidpreneur bazaar.

“Esaki ta e di tres edicion di e kidprenuer bazaar. Prome tabata na 2018, despues 2019 y e aña aki nos a hacie atrobe. Dus ta muchanan cu a bay nos proyecto di kidpreneur with big ideas y otro nan cu a bay kidsbiz market”, Croes a indica.

Kidsbiz market ta un otro proyecto di Idea enfoca pa e muchanan cu no ta bay traimerdia pa asina nan tambe por atende e tayernan durante vakantie grandi di scol of vakantie den october.

Croes a conta cu kidpreneur a cuminsa eigenlijk cu obranan di arte y cos cu e muchanan mes ta traha, pero e idea tras di e proyecto ta pa e mucha sinti cu e por ta un comerciante pa un dia. Aworaki nan por bin tambe cu cosnan cu por ta nan no ta usa mas na cas cu ta den bon condicion y bende esakinan tambe nan e kidpreneur bazaar.

“E meta ta pa e muchanan sinti con e ta pa por bende y haya su placa, con e por gana placa”, Croes a agrega.

Jenay Peterson di 11 aña di edad ta un di e muchanan cu tabata presente bendiendo su producto, slijm. “Slijm ta hopi bon pa bo y e ta manera un stress reliever y e ta leuk pa hunga cune. Mi tin dos diferente tipo di slijm, un cu ta fluffy y un cu ta cloud. Mi ta haya tur dos hopi bon”, el a conta

Cleintenanan por a yega na Jenay su mesa y bis’e ki color nan kier, e ta pone e color den e slijm y si nan kier toppings nan por agrega esaki tambe y Jenay ta entrega nan e slijm full cla.

Otro hoben cu a participa den e bazaar ta Layla El Jabakhanju di 15 aña. Layla tabata bende diferente cos dushi, manera oreo cubri cu chuculati, buscuchi di sucu, donuts di bolo, brownies, hot chocolate bombs, rice kirspies, entre otro treat cu e mes ta traha.

Loke e tabata bende, Layla a indica, ta un tiki di e gran variedad cu e tin normalmente den su menu. El a sigui conta cu el a cuminsa traha cos di dushi ora cu e tabatin 11 aña, pero den luna di juli otro aña e ta cumpli dos aña cu e ta oficialmente un negoshi cu ta bende cos dushi.

Henn Jethwani di 10 aña tabata bendiendo cadena, armband y renchi di horea cu e mes ta diseña y traha, algo cu ta mas cu un hobby pa e hobencita. “Den futuro mi lo gusta pa haci esaki mi negoshi”, el a bisa.

Otro hoben cu tabata presente na e kidpreneur bazaar tabata Javon Romney di 14 aña. Javon tabata bende cuadranan cu su mes a pinta. El a conta cu el a cuminsa pinta na un edad jong y el a bay les di pinta, el a stop di pinta pa un rato, pero aworaki el a cuminsa back.

Javon tabatin diferente cuadra y varios di nan tabata inspira ariba e naturalesa y beyesa di Aruba.

Otro di su cuadranan tabata un pintura cu el a traha pa un proyecto pa scol pa e ‘project week’ durante cual e topico di e proyecto aki tabata cushina Filipino. “Mi a pinta e cuadra pa scol y ami y mi grupo a gana un premio pa esey tambe”, el a conta.

Un publico grandi a atende e kidpreneur bazaar y tabata cumpra e diferente arte, obranan di man, cos dushi cu e muchanan tabata bende y asina nan tabata demostra nan apoyo pa e futuro comerciantenan aki.