Kita prome, despues pone atrobe; Entre decision mal tuma y incertidumbre

Remarcable tabata den e dianan aki e decision di gobierno pa revoca e medida di kita e reparatietoeslag pa pensionado.

Algo cu a causa bastante discusion despues cu aña pasa a yega na tal decision pa economisa como 11 miyon florin riba presupuesto 2019. Finalmente a dicidi di hala atras, mirando e reaccion fuerte den comunidad, no solamente di oposicion sino tambe di bon parti di e base di apoyo propio. Di un banda esey ta bon, pasobra e ta indica cu gobierno no a bira asina insensitivo pa critica di comunidad cu nan no ta haci caso mes. Algo cu den pasado nos a mira sucede demasiado biaha pa no ta cuidadoso den esaki.

E pensionadonan por hala rosea mas trankilo, pasobra nan ta keda cu e extra modera aki, cu pa esnan cu tin solamente un AOV, y den hopi caso un AOV reduci ademas, ya cu nos tin un contingente creciente di hende cu derecho riba AOV, pero cu tin un cantidad limita di aña como contribuyente na fondonan di SVb. Basicamente nos no a tende ainda cu tin preocupacion pa e situacion aki, unda gobierno y comunidad ta keda responsable pa garantisa tur ciudadano un minimo di bida aceptable. A lo largo nos mester dicidi, si ta duna extra entrada di algun forma na e hendenan bao di un cierto entrada, sino e gastonan di nan situacion ta bin pa gobierno toch. Loke na Hulandes ta yama ‘krepeergeval’ ta bira un fenomeno general.

Claro cu nos por a tende tambe comentario cu den e tipo di caso aki, e persona mes tambe tin responsabilidad. Berdad pero ora ta contempla cos na nivel general, esey no ta asina relevante. En corto, si bo tin un grupo creciente di hende cu no tin suficiente entrada pa nan por biba dignamente, nos como comunidad mester ‘step up to the plate’ di tur manera. Sea bo ta aumenta nan entrada como medida general di antemano, manera e reparatietoeslag tabata funciona, o bo ta haci e diferencia despues, a traves di areglo special pa esnan cu tin mester di esaki, ta un cuestion di gusto. Aunke tin diferencia si. Un reparatietoeslag tabata mustra masha bunita tempo cu a introduci esaki, pero den practica e ta duna bastante problema, mescos e toeslag riba e salarionan mas abao. Con bo por sa ta ken tin otro entrada y cuanto? No ta asina facil pa investiga y regla tur esaki, ademas cu un hende su situacion por cambia, por ehemplo ora un pensionado trahando ainda ta dicidi di stop di traha. E mester bay proba cu e no tin tanto entrada mas? Unda e ta acudi?

Contal cu tur esaki ta trece cune cu nos no ta papia di un areglo cu ta simple pa ehecuta, y por conduci na bastante hende cu ta haya un extra asina, mientras nan no mester di esey. Finalmente, riba e entrada aumenta cu e extra innecesario aki nan lo mester paga extra inpuesto, cu un retraso di cuatro pa cinco aña, asina cu finalmente, kico nan ta gana cune?

Nos no sa si e consideracionnan aki a hunga un papel pa kita e toeslag aña pasa. Nos tin e leve sospecho cu e tabata mas bien un medida contra un grupo di cual a kere cu nan no ta bay haci tanto ‘bochincha’, loke a resulta diferente. Pakico anto ataca entrada di e grupo aki, a sabiendas cu e ta afecta esnan mas vulnerable, pa un gran parti en todo caso? Nos ta kere cu aki a opta pa afecta e grupo aki, pasobra tin otro cu ta mustra miho organisa. Djis como ehemplo, no como propuesta concreto: gobierno por a opta tambe pa elimina un di e uitkeringnan di e empleado publico, por ehemplo e ‘bashipremie’. Den un solo biaha lo a baha e gastonan di personal, hopi bon pa CAft, sin cu a afecta ningun empleado publico kitando nan di trabao o cortando nan salario.

Pakico cada biaha ta purba di pusha e gastonan riba e otro gruponan den comunidad, mientras pa hopi aña caba, ta gobierno tin gasto di personal mucho halto. Y si a bisa caba cu gobierno ‘no ta asina inhumano pa kita tata y mama di famia di trabao’, pakico nan no ta entrega mientras cu un grupo, cu parcialmente ta consisiti di hende cu entrada hopi chikito, si mester entrega di e tiki cu nan tin. Nos ta contento cu finalmente gobierno a yega na realisa con malo e decision ey tabata, aunke nos no ta confia cu nos no ta haya mas di e tipo di medida aki. Pasobra awor, apenas aña a habri y ya tin un buraco di 11 miyon den presupuesto. Lo mester compensa esaki di otro banda y ta un cos so nos sa sigur: e ambtenaar no ta bay yuda paga. Ta bay ranca extra placa di nos den e reforma fiscal cu ningun hende conoce? By the way, na cual pais bo ta haya cu 5 luna prome cu implementa un reforma, nos no sa sikiera kico e ta? Dia 30 di juni venidero nos ta haya sa kico ta warda nos? Na 2006, den preparacion di e BBO tabatin mas claridad…

You May Also Like

Kico por haci cu cas y edificio bandona?

Nos tur conoce nan. E ruinanan den cualkier bario di nos isla, sea ta ...

Derecho di educacion pa ilegal? Si, esey ta loke ley ta bisa…

Riba e isla aki keto bay ta existi cierto situacionnan, cu ta pone nos ...

Cosnan pa drecha…

Demasiado pa menciona; ban un pa un Ta hopi cos un gobierno nobo tin ...

Cambio positivo na Dimas y Labor?

E siman aki nos por a tuma nota di algun cambio den e proceso ...

Gobierno ta pasa contractant pa ambtenaar

Nada straño den aña di eleccion… Ministro encarga cu financia ta disgusta cu loke ...

CAft tin diferente rapport?

Conclusion ta otro di locual gobierno ta pretende! Conclusion completamente contrario nos ta haya ...