Cu interes nos a sigui e intentonan di nos actual ministro encarga cu asunto economico pa mehora e trayecto di permiso pa negoshi, cu ta cay bao di su responsabilidad. A primera vista nos por constata cu a inverti den digitaliza e proceso, clarifica y simplifica algun aspecto, amplia e personanan cu no lo tin mester di permiso (como director), mientras tambe ta indica unda ta desea inversion prioritario. Un panorama bastante completo cu por ta un base pa mehoracion sustancial di e proceso aki. Y si logra esaki berdaderamente, e lo ta un estimulo y ehemplo pa e otro trayectonan di cual nos no ta tende nada, pero esey ta responsabilidad di su coleganan, critica su persona lo ta ‘barking up the wrong tree’.

En todo caso, e mandatario no a perde tempo despues di su nombramento pa concretiza loke el a mustra como meta na inicio. Loke ta importante awor ta pa e proyecto logra. Internamente esey tin un condicion ‘sine qua non’. Esey ta cu no ta e proceso di entrega documento ta defini e rapidez, sino e rapidez na final na momento di tuma decision. Si no haci esey, anto e proceso ta mustra bon, pero finalmente no ta contribui na mayor velocidad den henter e fluho. Esey ta pone un responsabilidad grandi riba e ‘decision makers’, ken cu nan ta, pasobra ta nan prestacion ta defini efectividad final. Ta di spera cu hustamente riba e punto aki ta bin un mehoracion cu nos no a mira den ultimo 20 aña.

Ta keda si algun punto pa tuma na cuenta. Un di nan ta cu e proceso promer cu yega na pidi un permiso pa establece un negoshi, di bay notario y funda e persona legal desea, ta un proceso largisimo, cu sigur ta keda spanta inversionista internacional. Na 2012 tabatin un comision di tur e entidadnan necesario pa analiza henter e trayecto, cu a bin cu varios proposicion cu manera semper a bay den e buki di olvido. Pa pone e asunto bon cla: nos no mester competi cu Singapore, unda por lanta un negoshi den cuestion di minuut, pero un proceso di varios luna pa yega na lanta y despues registra un empresa na Camara di Comercio y bay pidi permiso na DEACI, mester por bira mas cortico. Atrobe, pa esaki mester di otro mandatario di ken nos ni sa kico nan ta pensa…

Un ultimo aspecto cu si e mandatario di asunto economico ta maneha, ta e proceso di revocacion di permiso. Pa varios decada caba haya un permiso a bira algo manera bay cielo: unavez bo a logra pasa San Pedro bo ta cla! Cu esaki ta pone un banda un di e instrumentonan gubernamental mas importante pa eherce control riba economia. Na Aruba un appel putri no mester tin miedo di perde su negoshi, por pasa yen di cos pero actuacion contundente cerando un empresa pasobra a revoca su permiso, esey no ta contempla den e draaiboek di e departamento/ministerio. Esaki lo mester cambia, sino gobierno ta kita un base importante di tur ley, esta e supervision riba cumplimento, y gobierno ta keda un ‘watchdog sin diente’.

Un merito importante cu nos ta mira den e trabao haci ta cu esaki por sirbi pa otro trayecto di permiso cu ta sumamente importante pa sector empresarial. Nos ta papia aki principal, pero no exclusivamente, di e trayecto di permiso pa trahador di exterior. Di loke nos ta tende di comentario for di sector priva mes, no ta mira ningun adelanto. Esey ta conta pa tanto e aspecto laboral como e parti di e permiso di estadia mes. E ta keda un problema grandi, cu por tin consecuencia financiero grandi pa un empresa. Di otro banda, e falta di control y supervision efectivo riba abuso laboral ta duna un bonus extra na esnan cu no kier cumpli, haciendo e playing field mas desnivela ainda. Den mas di 30 aña practicamente no ta mira mehoracion den esaki, asina ta cu no tur culpa ta cay riba e actual ministro responsable. E punto ta si, cu e otronan a bay caba y ta e so por actua, o laga tur cos mescos, atrobe. Nos lo keda pendiente, pero sin mucho ilusion di mira algo positivo sali di e asunto aki.

Finalmente, tin un otro aspecto cu ta obstaculiza e potencial mehoracion cu e mandatario encarga cu asunto economico ta purba logra. Esey ta e incertidumbre crea encuanto e cuadro fiscal den cual un empresa mester opera. No ta pornada e mandatario menciona a ricibi gremionan empresarial preocupa pa e inaccion riba e tereno aki, salvo e prolongacion di bida di e BBO, cu riba su mes ta un di e asuntonan mas importante pa un empresa. Sin esey ta bira dificil pa elabora cualkier planficacion empresarial serio. Y esaki ta keda un di e puntonan unda aparentemente esnan cu ta dirigi gobernacion no kier comprende cu no por simplemente bisa sector priva: “Boso sinta keto te dia nos keda cla”. Aruba tin e tremendo oportunidad di haci un berdadero ‘opruiming’ den e selva inutil di impuesto cu nos tin, pero aki tambe nos por observa un falta di voluntad di gara e toro na su cacho y brinda sector priva un sistema fiscal atractivo, sin cu gobierno ta perde entrada. Y ainda no ta duna cuenta ta pakico no ta haci nada! Ta e Hulandesnan mester bira fastioso atrobe…?

LEAVE A REPLY

Please enter your comment!
Please enter your name here