Kiwanis Club of Aruba (KCA), e service club cu ta existi desde 1964, a organisa nan famoso torneo di golf caritativo na The Links at Divi Aruba. E evento a wordo sosteni door di un record di 22 hole sponsor como patrocinador principal y alabes un cantidad di 100 hungadonan di golf, cu a surpasa tur expectativanan.
E fondonan recauda pa e aña aki a wordo aloca entre Muchila Creativo – AWG 5000 a wordo otorga pa nan por cumpra un airco asina aporta na nan proyecto di conscientisacion y educacion sexual integral dirigi pa mucha y hoben uzando videonan moderno den un estilo accesibel. Un otro fundacion cu tin un proposito hopi importante y urgente ta Heart Centered Leadership Foundation; AWG 5000 pa e fundacion por sigui organisa tayer- y seminarionan pa hobennan pa yuda nan den nan desaroyo personal y profesional.
E ganadonan di e torneo ta como lo siguiente:
Closest to the Pin: Robert Aldrich
Longest Drive Ladies: Julie Majerus
Longest Drive Men: Chris Williams
Best Gross: Pierre Rafini, Greg Martis, Giovanny Atencio, Alex Molina
Best Net: Charles Latham, Derrick Huntington, Julie Majerus, Joshua Hubbard
E aña aki como premio pa e hole-in-one tabata un Ford Territory Trend 2024 cu a sser poni disponible pa Yrausquin. Lastimamente niun hungador tabatin e suerte e aña aki pa haci un hole-in-one, dus nos ta spera cu esaki si lo ta e caso pa otro aña!
Otro anja lo tin dobel celebracion; lo tin e di 15 edicion di e charity golf tournament mientras cu e club lo celebra su di 60 aniversario trahando na bienestar di e comunidad Arubano!
Kiwanis Club of Aruba ta existi desde 21 di november 1964 y ta un di e service clubs mas antiguo di Aruba cu un total di 40 miembro. E meta principal di KCA ta pa mehora e bidanan di muchanan na Aruba. Esaki ta wordo realisa door di organisa diferente proyectonan pa recauda fondo, trabounan boluntario y proyectonan di conscientisacion. Pa mas informacion tocante Kiwanis Club of Aruba por fabor bishita nos pagina riba Facebook.
