(CNN) – Kiwi, roggebrood y awa cu contenido mineral halto por yuda alivia constipacion cronico, segun guia dietetico nobo publica dia 13 di october pa Journal of Human Nutrition and Dietetics hunto cu Neurogastroenterology & Mobility.
Alrededor di 1 den cada 6-7 persona ta afecta pa constipacion cronico rond mundo. Na Merca, 9 pa 20 porciento di adulto tin un forma di constipacion cronico idiopatico den cual e causa no ta conoci. Algun sintoma di constipacion cronico ta inclui un movemento di tripa menos cu tres biaha pa siman, feces duro of den pida pida, y haya dificultad of dolor ora di bay af.
E guia “ta introduci cuminda y bebida (manera kiwi, pruim, roggebrood, awa mineral) y intervencion specifico cu suplemento den guia clinico, yenando un gap di hopi tempo entre investigacion y conseho clinico di rutina,” segun autor lider di e estudio, Dr. Eirini Dimidi a bisa den un email. “Esey lo yuda cliniconan conseho mas cla, mas personalisa y informa riba evidencia, y lo permiti hende maneha nan sintoma riba nan mes mas efectivamente.”
E guia ta aplica na adulto saludable cu constipacion cronico idiopatico y “no a enfoca riba constipacion secundario na otro condicion (manera malesa neurologico, embaraso), pues mientras algun recomendacion por aplica, mester usa nan cu cautela den e gruponan aki, como tambe den mucha,” segun Dimidi, profesor asocia den ciencia nutricional na King’s College London.
Dimidi a agrega cu e guia no ta inclui recomendacion general pa aumento di fibra den dieta di e pashent. Na su lugar, a enfoca riba cuminda specifico cu por tin beneficio.
Conseho dietetico anterior tabata amplio, manera bisa pashent pa come mas fibra. Pero e guia nobo, Dimidi ta bisa, ta sugeri “incorpora cuminda y bebida basa riba evidencia den bo dieta, manera consumi 2-3 kiwi pa dia.”
A diferencia di otro cuminda recomenda manera pruim, kiwi ta simpel y facil pa incorpora den bo dieta. “Cu kiwi, pasobra e ta asina bon tolera, usualmente bo por djis bay den e dosis ey, a diferencia di pruim, por ehempel, unda bo mester move mas gradualmente pa yega na e dosis di seis pa ocho pruim pa dia,” segun Dr. William Chey, profesor y hefe di gastroenterologia y hepatologia na Universidad di Michigan. E no tabata involucra den e investigacion nobo.
Kiwi por aumenta ‘bulk’ den feces y contenido di awa, mehora digestion di proteina, y suavisa e movemento di cuminda, likido y desperdicio den e sistema digestivo. E fruta chikito tambe por mehora e cantidad di tempo cu ta dura pa desperdicio pasa door di intestino y tin efecto prebiotico natural, manera mehoracion di digestion y reduccion di inflamacion. Bo por hasta come e casca, cu tin fibra adicional. Pero no kenta e kiwi, pasobra temperatura halto ta destrui en enzym cu ta suavisa movemento di intestino.
