Cada fin di aña na Aruba ta trece cu ne cu famianan ta bini hunto riba dianan di fiesta pa asina celebra. Aruba ta un sociedad multicultural, pues tin un pluralidad di celebracionnan cu ta wordo teni, entre nan Noche Buena, Pasco, Kwanzaa y Hanukkah. Pero algo cu si ta keda persisti sin importa ki tipo di celebracion ta tuma luga ta tiramento di klapchi riba nos isla.

Tin hende cu lo bisa cu tiramento di klapchi ta un tradicion riba su mes caba na Aruba. Pero tin personanan cu sea no ta disfruta ni deleita den e actividad aki pa diferente rason, of nan ta completamente contra y lo kier pa e practica stop. Riba Bon Dia su ultimo edicion di 2017 lo nos kier pone atencion na e diferente aspectonan cu comunidad riba ambos banda di e debate aki ta treciendo dilanti riba medionan social.

Tradicion
Durante un compania su celebracion di fin di aña ayera atardi, Bon Dia a combersa cu un famia cu tabata disfrutando di un fenomeno cultural cu nos tur conoce: pagara. Specificamente ora ta cende pagara dilanti e negoshi su oficina of edificio pa celebracion di fin di aña. Mientras e restonan di e pagara tabata zwaai den laira, Jeritza Kelly a conta nos con p’e, klapchi ta parti di tradicion. E tradicion di pagara segun sra. Kelly ta pa habri caminda pa bendicionnan y prosperidad den e aña nobo. Riba medio social e opinion aki tambe tabata comparti Artemis Geerman, kende a expresa cu ‘pagara tradicionalmente ta uza pa somenta e mal aire, klapchi en general no’.

Jaycey Kelly di su banda a splica cu ora el a bay Hulanda, el a nota cu pagara en particular no ta wordo cendi pa casi ningun negoshi. Cu excepcion di comunidad y negoshi Chines, Hulandesnan mes no tabatin e custumber aki, segun sra. Kelly. “Mi ta haya e ta parti di nos tradicion pero e aspecto aki na Hulanda a sorprende mi.” Durante e fiesta un mata chikito pega na palo di luz a cende na candela pa via di e pagara. Despues di a mira esaki un persona a yega paga esaki.

Consideracion pa bestianan y medio ambiente
Di otro banda di medaya, e aspecto di tradicion a wordo cuestiona pa algun persona riba medio social, pasobra ‘tradicion ta cambia’. Femke Hooijmaaijers a menciona cu den pasado hende muhe no tabatin derechonan, pero esaki a cambia despues di tempo. “Wak tambe e discusion tras di Zwarte Piet, awendia e no ta na su luga. Mescos cu esaki klapchi ta un tradicion bunita pero loke hende no ta tene na consideracion ta nos bestianan. No solamente e mascotanan pero tambe e parhanan, shoconan ta wordo trauma pa via di klapchi. Mi no ta kere esaki ta pertenece na nos tempo.”

Clinica Veterinario na Wayaca a manda un comunicado na publico pa asina corda doñonan di mascota pa pasa busca nan trankilisante pa asina proteha mascotanan contra e zonidonan di klapchi. E tranakilisantenan aki ta wordo uza pa laga mascotanan drumi pa par di ora prome cu culminacion di ‘el cañonazo’. Nos a purba tuma contacto cu veterinario pa asina clarifica si klapchi por causa trauma of otro tipo di daño na mascotanan riba termino largo y corto como tambe pa bestia riba caya pero no a logra haya comentario.

Gina Jie-Sam-Foek di su banda a comenta cu e no ta bay di acuerdo cu e uzo di klapchi pa via di e mesun situacion cu bestianan riba caya ta enfrenta encuanto e material explosivo y festivo. Pero mas aleu ‘e lawaai y polucion sigur ta un problema’. Apart di esaki el a expresa cu klapchi ta wordo traha por medio di child labor. “Te cu hende cu ta traha cu e material ta haya cancer den nan man, tin hopi rason pa ta contra klapchi.”

Tin mas persona cu a vocifera nan descontento cu e manera con pagara en particular ta laga hopi sushi riba caya despues di dianan cu nan ta wordo tira.

‘Tradicion y cultura tin aspecto negativo pero mester keda responsabel’
Un hoben cu a pidi pa keda anonimo a compara klapchi na otro tradicionnan manera Carnaval, Dande y Dera Gay. “Mi a crece cu klapchi y awo cu mi ta creci mi ta disfruta di dje ainda.” Pero e hoben a subraya cu si keda obhetivo ‘lo bo nota cu tur nos tradicion tin aspectonan negativo y te hasta peligroso’. “Carnaval, entre otro ta promove uzo di alcohol excesivo y por wordo demostra cu ta causa hopi embaraso hubenil. Cu Dera Gay tradicionalmente nos ta kima mondi, cual ta algo negativo pa nos medio ambiente. Dande ta promove conduci bou influencia di alcohol, etc…”

Sinembargo e hoben ta subraya cu e ehempelnan aki no ta aplica pa tur hende, ‘tin hopi hende cu si ta celebra cultura cu responsabilidad’.

 

Alvaro Murillo di su banda a a reacciona bisando cu no por compara klapchi na tur otro tradicion di Aruba djis pasobra e tambe tin su aspectonan negativo. “Tur cos tin aspecto negativo y positivo, mescos e concepto di Yin Yang. Ami lo kier puntra te ki punto klapchi ta un tradicion Arubano si klapchi ta un invencion y industria cu a bin di China?”

‘Dos mucha a muri cu nunca mas lo disfruta di klapchi’
Charles Croes a critica e discusion di su banda, bisando cu ‘laga e klapchinan un banda y ban refocus riba e daño cu adultonan ta causa na muchanan’. Kinan sr. Croes ta referi na Rishandroh y Roshandrick. “Mi ta haya cu nos tin cu stop di bula riba e preocupacion of keho di dia y despues casi automaticamente lubida di dje despues. Dos mucha a wordo maltrata y a muri.”

Uzo di klapchi den orarionan mas limita
Claude de Cuba a expresa cu e mes ta contra e klapchinan cu ta explota cu zonido duro, manera Thunderking y Daddy Single Voice. “Lo ta bon si e uzo di esaki wordo limita pa cierto orarionan so. Porta di 6 or di atardi te 3 or di madruga so.”