Hulanda ta consciente di e problematica di stranheronan na Aruba y otro paisnan den Reino Hulandes, y ta duna sosten pa enfrenta e reto aki. Pero, forma parti di un tratado cu ta mara e pais na percura cu no tin impunidad pa abusadornan ta keda un decision autonomo di Aruba.

Asina Gabinete Hulandes, pa medio di Secretario di Estado Demisionario pa Asuntonan di Reino Raymond Knops a informa Parlamento Hulandes. E comentario tabata specificamente dirigi na Comisionnan fiho di Relacionnan di Reino di Eerste y Tweede Kamer cu a pidi Secretario di Estado pa Asuntonan di Reino, drs. Raymond Knops pa duna reaccion riba e lista di palabracion di e Conferencia Interparlamentario di Reino, IPKO cu a tuma luga fin di Augustus na Boneiro.

Knops a ilustra e proceso di sosten di likides, pa permiti e paisnan continua cu nan obligacionnan basico, bao condicion cu mester reforma pa fortifica resiliencia financiero, economico, institucional y social. E reformanan ta describi den e landspakket.

Aruba

Na 2019 a pone 23.8 miyon euro pa e problematica di stranhero y migrantenan riba e paisnan di Reino den Caribe. Banda cu e fondonan tabata pa sostene entre otro Wardacosta, Aruba a haya sosten specifico pa e organisacion di asilo y admision, pa facilita e proceso pa repatriacion, y percura cu tin provision cu tabata bao presion pa motibo di fluho halto di personanan indocumenta. Aki ta papia specificamente e centro pa hende muhe y prison. Ta brinda e sosten aki desde 2019, y a pesar cu COVID-19 a trece retraso, practicamente tur e proyectonan ta completa.

E Secretario di Estado a mishi cu e preocupacion di e 60 miyon di recorte den cuido, algo cu Parlamentarionan di Aruba a comparti cu nan coleganan di Hulanda. “Hulanda ta keda den combersacion cu Aruba riba con e pais mes ta interpreta con pa reduci 60 miyon florin den e sector di cuido.”

Es mas, segun Knops ta desde 2013 caba tin combersacionnan entre Hulanda y paisnan CAS, Corsou, Aruba y St. Maarten riba cuido. E deliberacionnan aki a intensiva na 2020 pa motibo di e crisis di COVID-19 na reunionnan mensual, na nivel gubernamental y tambe di ambtenaar. E Secretario di Estado pa Salud tin e guia. A palabra cu e paisnan lo continua cu e plataforma di deliberacion aki tambe despues di e pandemia, unda lo trata otro temanan di balor pa cuido.

Relacion amistoso

Mester bisa cu drs. Raymond Knops a remarca cu e deseo di delegacion di Corsou pa yega na relacionnan mas amistoso denter di Reino a yama su atencion. Particularmente pasobra e orden legal denter di Reino ta regla pa Statuut. “Statuut ta determina cu cada pais ta maneha su propio interes y cu a base di igualdad ta percura pa interes comun y ta duna sosten na otro. Un bon relacion ta esencial pa duna contenido na e punto aki y Gabinete (Hulandes) ta traha riba esaki. Un bon relacion interno ta rekeri atencion continuo y tin biaha e por crea iritacion. Hulanda a purba desde comienzo di e crisis di corona, pa sostene paisnan di tur sorto forma. Tambe ta Hulanda ta esun cu a ofrece e sosten di likides y otro, a cambio di reformanan necesario pa yuda fortifica economia y haci e sociedad mas resiliente.” Y Hulanda den e caso aki lo duna contenido na e proceso hunto cu Corsou.

Miho relacion denter di Reino

Knops a sigui bisa cu na e momentonan aki Gabinete Hulandes ta tuma diferente paso pa mehora comprension mutuo y crea mas confianza entre Hulanda y e parti Caribense di Reino. Esey ta sosode den practica pa medio di colaboracion mas intensivo entre ambtenaarnan y dirigentenan di e paisnan. A crea un curso di dos dia pa ambtenaarnan Hulandes hunto cu e Haagse Hogeschool pa crea mas conocemento y comprension pa e parti Caribense di Reino y asina fortifica e colaboracion mutuo. Intercambio cu municipionan Hulandes tambe lo yuda. Ademas, a lanta e grupo di trabao ‘Mocion van Raak’ cu entrante November ta bay wak cua posibilidad tin pa mehora e relacionnan den Reino y duna esakinan un forma mas duradero. E grupo di trabao aki lo mester enfoca na prome instante riba e pregunta cua ta e temanan cu ta pertenece na e discusion aki. E identificacion di un area di tension entre e autoridad forma y tareanan y efecto di esaki den practica lo pas den e trabao aki.

Banda di esey, e instruccion di e Legislado di Reino den articulo 12 a di Statuut pa crea un geschillenregeling ta keda para. Miembronan Hulandes di Conseho di Minister di Reino lo keda pendiente un concepto di ley nobo cu a keda anuncia. Aki ta importante pa e paisnan di Reino den Caribe busca sosten amplio na tempo pa e tema aki, tabata e comentario di Raymond Knops.

Derechonan Humano

E ta bon pa sa cu e implementacion di Tratadonan di Derecho Humano tin atencion di e delegacionnan Parlamentario, segun drs. Knops. El a bisa cu na e momentonan aki, Gabinete Hulandes no ta mira necesidad pa investiga si e Colegio di Derecho di Hende mester duna sosten. E meta ta pa logra implementacion a base di promocion na nivel di Gobiernonan. Ya tin un comision derecho humano lanta na nivel di ambtenaar y den e comision aki ta papia con e cuater paisnan di Reino por sostene otro den implementacion di e tratadonan, cu den algun caso, a keda hopi atras den e paisnan den Caribe. Di eynan ta mira cua ta e pasonan cu mester tuma di parti di e Gobiernonan. E comision ta spera di por presenta su prome resultadonan di e colaboracion aki na e Parlamentonan di Reino Hulandes.”

Tratado di Instanbul

Pa loke ta e Tratado di Instanbul, Gobierno Hulandes ni Secretario di Estado tin un papel formal of responsabilidad pa e paisnan autonomo den Reino Hulandes ratifica e convenio aki. Ta trahando pa e bira aplicabel na Islanan BES, pero ainda Aruba no a mustra disponibilidad pa ratifica e tratado.

E Convenio di Instanbul of Tratado di Instanbul ta e Tratado di Conseho di Europa pa preveni y combati violencia domestico y contra hende muhe. E ta un tratado di derecho humano Europeo di 2011 cu ta pa preveni violencia, proteccion di victima y termina e impunidad di e perpetradornan, of esnan cu ta comete e violencia. “Mi departamento tin un papel pa promove e colaboracion entre paisnan pa implementa tratadonan, entre otro e Tratado di Instanbul. Pero e ta un decision autonomo di cada pais. E comision di tratado di derecho humano ta trahando hunto cu e paisnan pa yega na medidanan di implementacion mas lihe posibel. Y e Ministerio di Salud, den colaboracion cu e Minister pa Asuntonan Interior ta organisa conferencianan riba violencia domestico y abuso di mucha pa tur e seis islanan den Caribe, pa asina comparti conocemento y promove colaboracion. Asina ta preparando un acuerdo di cooperacion pa asina permiti cu tin forma pa yuda victimanan entre e islanan.”

Estado di Derecho

E delegacionnan Parlamentario a pone atencion na estado di derecho y periodismo independiente. Na Hulanda a tuma e Mediawet na 2008, cu ta duna medionan di comunicacion publico y comercial autonomia redaccional. Islanan BES tambe tin un ley asina. Y na Hulanda, Gobierno ta sostene periodismo independiente cu subsidio, pa medio di e Fondo di Estimulo pa Periodismo.

Promocion colaboracion y ehecucion landspakket

Gabinete Hulandes ta enfatisa e importancia pa explora na nivel regional e aspectonan di prevencion y detencion. Ya caba e JVO, cu ta e Justitieel Vierpartijenoverleg, esta e reunion Husticial entre e Ministernan di Husticia y nan ehecutivonan a toca e temanan aki. Na Juli di e aña aki a papia entre otro e medidanan di TBS, posibilidadnan di e cuido forensico den e region di Caribe y Parlamento Hulandes a keda informa di dje.

Pago electronico

Gabinete Hulandes ta considera cu acceso na sistemanan financiero stabiel ta condicionnan pa desaroyo economico di e paisnan den Reino Hulandes y pa desaroyo propio di e habitantenan. Mescos cu na Hulanda, e trafico di pago den e paisnan ta na encargo di partidonan comercial. En principio, e ta keda na e partidonan di mercado mes ta determina si ta ofrece servicio di pago electronico. Gabinete Hulandes lo percura cu e leynan lo no stroba esaki. Acuerdonan comercial pa Hulanda ta keda negocia pa Union Europeo y ta conta unicamente pa e parti Europeo di Reino Hulandes. Mirando cu e paisnan CAS ta autonomo, nan por negocia tratadonan comercial nan mes. Knops ta kere cu ta e paisnan tambe lo mester determina si mester un organisacion manera ta existi pa Islanan BES riba e tereno aki, cu ta e Autoridad Mercado Financiero cu ta supervisa e empresanan financiero di Boneiro, Saba y St. Eustatius.

Reformanan lo yuda

E preocupacionnan di Aruba, pero tambe Corsou y St. Maarten cu e reformanan lo crea reto nobo, por ehempel ora ta trata di financiamento di maneho nobo, maneho social, provision di cuido di salud y haci e aparato publico uno efectivo ta conoci cerca Raymond Knops. “Hopi di e reformanan ta netamente dirigi pa trece finanzas den balans. E reforma den e structura di belasting lo mester contribui na aumenta entrada di Gobierno y modernisacion di e aparato publico lo baha e gastonan. Asina aki ta crea espacio pa impulsonan di calidad riba otro tereno.” Knops a comenta.

Tambe, Gabinete Hulandes ta enfatisa e importancia di bon enseñansa den tur e paisnan y cu e colaboracion entre nan lo yuda hisa e nivel. E Minister di Enseñansa di Hulanda a yega na palabracionnan concreto cu e Ministernan di Enseñansa di e paisnan den Caribe na Januari 2021. A yega na palabracionnan concreto pa un cooperacion mas fuerte. Banda di esey, den cuadro di e landspakket a cuminza caba cu un revision di enseñansa den e paisnan. A base di e resultadonan Hulanda lo yuda e paisnan pa implementa e recomendacionnan pa asina mehora calidad di enseñansa.

Sustainable Development Goals

Finalmente, drs. Knops tabatin hopi interes den e combersacionnan riba e progreso y retonan den cada pais riba e tereno di SDG’s, esta Sustainable Development Goals, esta e Obhetivonan di Desaroyo Sostenibel di Nacionnan Uni. Particularmente riba e area di cambio di clima y durabilidad.

Riba e pregunta si Hulanda lo por yuda e tres paisnan pa uni na e Organisacion Mundial di Comercio, WTO, Knops a bisa cu Aruba y St. Maarten mes mester haci peticion pa bira miembro independiente. Corsou a haci esaki, y si e Conseho General di WTO acepta e peticion, Corsou lo mester negocia potencialmente cu tur 164 pais miembro riba e condicionnan pa drenta e organisacion. Un di e condicionnan ta e schema di tarifanan. Ta pa e motibo ey cu ta dificil pa duna un proyeccion riba e obligacionnan huridico y economico, ademas di e beneficionan cu por sali di un asociacion asina. “E ta keda na cada pais pa negocia esaki.”

Como coordinador di Relacionnan den Reino pa Gabinete Demisionario Hulandes, Knops a percura cu e diferente Ministernan duna nan reaccion riba e lista, entre otro Ministernan pa Asuntonan Exterior, Finanzas, Infrastructura, Husticia, Naturalesa y Enseñansa, ademas di Secretario di Estado pa Clima, Asuntonan Social, Labor, Salud, Bienestar y Deporte. Bon Dia Aruba lo amplia riba e contestanan aki den un proximo edicion.