Diamars a tuma luga un conferencia di prensa na unda Director Ehecutivo di Kamer van Koophandel en Nijverheid Aruba (KvK), Martijn Balkestein, hunto cu presidente di e Member Daily Board, Monica Kock, a anuncia cu entrante 1 di januari 2023 UBO-register lo drenta na vigor.

Ta introduci UBO- register introduci di acuerdo cu cambionan di ley pa preveni y combati labamento di placa y financiamento di terorismo (LWTF). En conexion cu esaki, KvK a haya e tarea importante cual ta e implementacion y mantencion di e UBO-register.

Balkenstein ta splica cu UBO (Ultimate Beneficial Owner) ta e persona cu na final ta e beneficiario of esun cu por tuma decision di un compania, fundacion of asociacion. E persona cu tin mas cu 25% di e bienes di un empresa of personanan cu den statuut ta directornan di compania.

Mayoria di compania mester cumpli cu e registro aki, cu excepcion di algun tipo di compania solamente. E entidadnan cu no tin e obligacion di registra nan UBO, cu ta wordo exonera di e registracion, ta eenmanszaken, asociacionnan cu no tin hurisdiccion completo y asociacionnan di propietario.

Balkenstein a indica cu ta pidi solamente algun dato personal pa e UBO, nada complica. Locual ta pidi na momento di registra ta e nomber, fam, sexo, fecha di nacemento, adres, persoonsnummer y nacionalidad.

“Pa facilita e registracion y elimina erornan nos a purba di traha mas tanto posibel cu pop-up fields”, el a agrega.

Alabes, el a remarca cu ta hopi importante pa indica e volumen di e interes economico di e UBO den e compania.

Balkenstein a menciona tambe cu companianan cu registra despues di 1 di januari 2023 ta keda registra via notariaat, pero tur e companianan cu ta existente tin e obligacion di registra nan UBO dentro di 18 luna na KvK.

Contrario di e registro comercial y e registro di fundacion, el a subraya, e UBO-register no ta publico. Na Hulanda e UBO-register si tabata publico, pero fiscal a indica cu esaki ta viola algun derecho y leynan y pues a cera esaki. “Na Aruba nunca tabata e deseo of intencion di haci esaki publico”, el a sigura.

Balkenstein a sigui splica cu e registro lo ta disponibel solamente pa cierto entidadnan, autoridadnan competente pa haya acceso. Ley ta determina e autoridad competente y esey ta e grupo cu por haya acceso pa tur tipo di dato relaciona na UBO na momento cu nan ta haci e trabou pa un due diligence.

Di otro banda nan ta reconoce tambe proveedor di servicio financiero y proveedor di servicio no financiero cu tambe por haya cierto datonan, no tur dato y esey ta solamente na momento cu nan por prueba cu nan ta haci e trabou ey pa un investigacion.

“Ta hopi importante pa pais Aruba y Camara di Comercio pa mantene e integridad di e sector comercial y limita e posibilidad di fraude. E leynan internacional lo haci cierto accionnan entre Aruba y otro paisnan dificil y por core riesgo cu un due diligence ta wordo poni ariba cada transaccion entre Aruba y otro paisnan. P’esey ta hopi importante cu nos ta cumpli cu leynan internacional y cu e UBO-register nos lo haci esaki”, Balkenstein a indica.

Sra. Kock a indica cu inicialmente e presion riba comercio ta bay ta pa registra y como KvK nan ta kere cu introduccion di e registro aki ta algo positivo pasobra na momento cu ta combati labamento di placa ta hopi importante pa tin tur e hermentnan necesario y registro aki ta un herment cu ta hopi importante pa e banda ey cu por wordo controla.

El a agrega cu nan tabatin basta aña caba trahando riba esaki y e unico cos cu como Camara di Comercio nan tabata trece dilanti ta cu e registro no mag di ta habri pa tur hende pasobra e ta un registro traha pa combati labamento di placa y nada otro.

“Nan a cumpli di e banda ey y nos ta positivo pa esaki. Comerciante mester djis haci su trabou pa administra, e ta un tiki un trabou administrativo, pero unabes cu bo a registra ken tur ta doño di bo compania bo ta cla. E no ta bay ta algo cu tin un impacto mensualmente”, el a enfatisa.

El a remarca cu e movemento aki ta pasando rond di henter mundo. E ta un di e hermentnan mas efectivo cu tin cu ta wordo usa pa combati labamento di placa y den combatimento di labamento di placa un di e preguntanan mas importante ta ken ta e doño di e compania.

Pa loke ta e control si e UBO ta legitimo, Kock a splica cu nan ta yega te na un liña di controla. E obligacion di registra e accionistanan ta di e director cu e accionista. “No ta asina cu Camara di Comercio tin e obligacion di bay check cu tur compania kico ta kico. Bo ta entrega tur bo documentonan y e back up pa mustra cu e hendenan ki ta accionista y si nos tin pregunta nos lo haci pregunta”, el a indica.

Pa e trabou aki Camara di Comercio tambe mester a busca mas hende acerca cu tin conocemento riba e parti aki pa controla y verifica, a base di informacion ricibi, ken ta e doño.

Den caso cu un UBO duna informacion robes of falso, e por ricibi un boet pa esaki. Den caso cu esaki pasa, Camara di Comercio no ta e instancia cu lo ta encarga di duna e boetnan of di duna sancion.

Kock a señala cu Gobierno lo tin su instancia separa pa esaki y KvK lo solamente notifica den un caso asina y e persona cu a manda informacion falso aden ta ricibi un boet.

Pa loke ta trata di e cumplimento di e companianan cu nan debernan, Kock a indica cu Cada compania cu ta registra tin diferente deber pa cumpli cune. Un di nan ta cu nan tin cu paga nan pago anual. Si nan no cumpli cu esey, y segun cambio di ley, un compania cu tin dos aña cu no ta paga esaki, KvK por tuma accion contra e compania y hasta sak’e for di registro. Den e caso aki alrededor di 80% ta cumpli cu nan deber di pago anual.

Kock a agrega cu tin un grupo di compania cu tin cu sali for di nan registro debi na e cambio di ley, cual ta e companianan ABV. El a agrega tambe cu tin hopi compania cu nan ta ripara ta drumi of no activo. El a enfatisa, specialmente na e grupo aki, pa nan cera e companianan y hopi biaha esey ta e companianan tambe cu no ta cumpli cu nan pago.