Camara di Comercio di Aruba a trece dilanti diferente preocupacion den un conferencia di prensa pa loke ta trata e intencion di gobierno pa introduci un salario minimo pa director/accionista di companianan chikito.

Monica Kock presidente di e instancia aki a expresa cu dia 8 di november nan a manda un carta pa Gobierno di Aruba pa nan preocupacion riba loke ta trata e medida cu un director accionista di un compania mester paga su mesun salario di maximo 4.166 florin.

Den e carta ey, nan a splica diferente punto di pakico nan no ta di acuerdo cu esaki y un di e puntonan importante ta cu si ta trata di un compania chikito -unda e 70% di e companianan inscribi na Camara di Comercio di Aruba ta companianan chikito- si e compania aki tin maximal 100 mil na entrada, e 50% di esey e director tin cu paga su mes como director accionista y e otro 50% ta pa e resto di gastonan.

Den e carta el a splica cu nan a haci un calculacion di e salario cu tin cu gana, ademas di loke tin cu paga como social premiums, pension, huur, BBO, BAZV, awa y coriente, loke ta nifica cu pa e comerciante e suma di placa cu lo keda p’e ta hopi abou.

“Manera nos tur sa, no tin un negoshi cu ta coy di su entrada anto cu e 50% paga pa bo mes como director accionista”.

E suma cu gobierno kier haci y e motibo ta segun Kock a señala, ta pa gobierno genera mas placa pero esey no ta un sistema corecto, “nan ta bisa, si nos tin dividend y nos kier bay laga e dividend, esaki ta un belasting cu bo ta paga riba ganashi, pero esey ta ora bo tin ganashi, pero si bo no tin ganashi, bo no tin nod’i pag’e, awor bo ta obliga di paga bo mes e suma aki, los si bo negoshi tin ganashi si of no”, el a bisa.

Mirando e cifranan y comentarionan cu nan a haya, KvK ta indica cu negoshi chikito no por paga esey na nan mes y e consecuencia ta bay ta cu si nan ta obliga di haci esaki, esey kiermen cu mester kita hende of cera e negoshi pa motibo cu si e entrada no ta yega mas, no tin otro alternativa cu pa cera e negoshi.

“A nos ta hopi preocupa pa e negoshinan chikito, si e 70% di esey ta e negoshinan cu nos tin den nos comunidad, net e negoshi ey ta esun cu ta bay sufri mas cu cualkier otro negoshi, e negoshinan grandi no ta bay sinti’e tanto pasobra e maximal ta 4.166 florin y negoshinan grandi por carg’e”, Kock a señala.

Asina mes, el a sigura cu nan ta hopi preocupa y nan tin hopi pregunta riba esaki pa motibo cu el a sigura cu e cuestion ta cu nan tin diferente hende cu ta director di compania pero no ta traha, nan tambe tin cu cobra salario y si tin tres director cu tur di nan ta accionista, nan tres tin cu haya salario.

“E parti mas cardinal ta, si bo ta haci esaki pa trece mas entrada aden a nos ta premira cu por ta e prome lunanan e ta trece entrada aden, pero despues e ta bay baha” el a bisa.

Den nan opinion, e consecuencianan ta funesto y e pregunta ta “cuanto placa esaki ta trece aden compara cu e 10% cu ta riba e ganashi? Kock a puntra.

Nan ta premira cu nan no ta wak cu Departamento di Impuesto por carga esaki den sentido cu Kock tambe el a bisa con nan ta bay controla si ya awor caba cu tin un dificultad cu control di BBO y compliances, “nos tur sa cu compliances di DIMP ta un di e problemanan cu tin”, Kock a sigura.

Igualmente, el a señala cu gobierno ta bay pone su mes den un direccion cu e no tin cu bay sinta na dje di bay determina cuanto e salario ta bay ta como director accionista, ley ta duna e posibilidad pa pone un salario minimo pa tur hende na Aruba cu ta traha pero actualmente ta bay bisa cu awor ta bay duna na e director accionista un salario mas halto y ta bay trata e hende diferente den e parti ey.

Tambe e pregunta ta bay cu den sistema di leynan di Aruba tin companianan cu tin director yun ley unda ta para cu compania ta liber pa dicidi si e ta bay cera un acuerdo laboral cu un director, tin director cu no ta traha y tin director cu di berdad tin un acuerdo laboral.

Kock tambe a sigura cu companianan chikito no por carga esaki y mas ainda cu na januari e BBO ta subi cu un 1% mas y otro medidanan cu lo tin efectonan riba negoshi cu por trece cune consecuencianan grandi.

Kock a informa cu nan a manda un carta pa SVb e luna aki riba e tema aki unda cu na december a bira conoci cu SVb no ta sigura un director accionista mas indicando cu segun ley y hurisprudencia nan no ta wordo considera como un trahado of e acuerdo cu nan tin cu e compania no ta wordo considera como un acuerdo laboral.

Den e carta aki, nan a splica cu tin un parti contradictorio compara cu Departamento di Impuesto, e consecuencianan ta cu e hendenan aki ta hopi y nan no ta sigura tur e tempo ey, e prome pregunta tabata si den tur e añanan cu nan a paga na SVb nan ta bay haya nan placa bek. Pa KvK e decision unilateral aki di SVb no ta corecto y nan manda pa SVb coregi esaki.