KvK ta anuncia: UBO-register ta drenta na vigor entrante 1 di januari 2023

Director Ehecutivo di Kamer van Koophandel en Nijverheid Aruba (KvK), Martijn Balkestein, hunto cu presidente di e Member Daily Board, Monica Kock, a anuncia ayera mainta durante un conferencia di prensa cu entrante 1 di januari 2023 lo drenta na vigor e UBO- register en conexion cambionan di ley pa preveni y combati labamento di placa y financiamento di terorismo (LWTF).

Kock a splica cu na principio di aña KvK a anuncia cu lo bin implementacion di un registro nobo, esta UBO-register (Ultimate Beneficial Owner). UBO ta un registro na unda tur doño di compania ta registra. Actualmente no tin un registro ainda cu tin esey y entrante 1 di januari 2023 tur compania tin e obligacion pa inscribi e doñonan di nan compania den e registro aki.

E obligacion di registracion aki ta cay riba e director y doño di e compania. Den caso cu e director of doño di e compania ta un entidad huridico, tur e dirigentenan di e entidad aki mester yena e formulario digital corespondiente pa registra UBO. Tambe ora tin cambio den e doño(nan) mester registra e cambio aki na KvK.

Si no cumpli cu e obligacion aki manera ta para den ley, Kock a indica, e compania lo por ricibi un boet y e boet aki por yega hasta 100 mil florin.

Pa loke ta companianan nobo cu lo wordo lanta despues di 1 di januari 2023, notaris lo haci un parti di e trabou aki door cu nan tin tur e informacion na e momento ey. E companianan cu ya ta inscribi den e registro di KvK, desde januari mester bay online y inscribi kenta e doño di e compania.

“Si bo no cumpli cune ta bay tin consecuencia, pero ta bay tin tempo si pa e companianan cu ta registra caba pa haci nan registracion di UBO. Pero nos ta urgi tur hende pa haci e registracion aki”, Kock a remarca.

El a subraya, specialmente pa doñonan di compania cu nan negoshi of compania no ta activo, e compania ta “drumi”, cu no haci e registracion di UBO, nan lo por ricibi un boet naturalmente. Na mesun momento el a sugeri cu si e compania no ta activo pa cera e compania y asina evita cualkier tipo di boet.

E entidadnan cu no tin e obligacion di registra nan UBO den e UBO-Register, pues cu a wordo exonera di e registracion, ta eenmanszaken, asociacionnan cu no tin hurisdiccion completo y asociacionnan di propietario.