Camara di Comercio (KvK) a vocifera su opinion varios biaha caba di e importancia pa comercio en general haya tur oportunidad posibel pa por opera normal, mas aun den e periodo di crisis economico actual. Pa acelera e recuperacion economico ta importante cu comercio por sigui brinda servicio na nos hendenan local y turistanan.
Den pasado semper Minister di Finanzas, Asuntonan Economico y Social (MinFEC) a otorga dispensacion di ciere di negoshi riba e dianan festivo y/o di conmemoracion oficial. Sinembargo, esaki no tabata e caso e aña aki, pa loke ta trata Dia di Betico, dia di Himno y bandera y e dianan relaciona cu Pasco Grandi. KvK ta comprende cu den e pandemia actual tin cu tene cuenta cu e interesnan pa loke ta trata salubridad publico, pero no obstante mester tin espacio pa comercio por genera entrada.
Pa e motibo aki, KvK a acerca MinFEC por escrito cu e peticion pa indica e intencion di gobierno pa cu e proximo dianan festivo.
KvK a ricibi e grato noticia for di MinFEC cu lo otorga e dispensacion di ciere pa Dia di Rey y Dia di Asuncion. Di e forma aki e comerciante mes por scoge di ta habri y continua di duna servicio riba e dianan ey. Esaki sigur lo yuda fortalece nos economia.
Camara di Comercio ta desea tur hende feliz dianan di fiesta, y na mesun momento ta haci un apelacion na un y tur pa atene nan mes na e medidanan cu ta na vigor pa combati Covid-19.
