KWF: Gasto mas grandi ta cuido na cas pa pashentnan terminal

Presidente di Koningin Wilhelmina Fonds, Lilian Prince a informa cu cada aña e cifra di  gastonan cu e fundacion aki tin, ta aumenta considerablemente, esaki debi na e ayudonan cu nan ta brinda na e pashentnan victima di e malesa conoci como cancer.

Aunke aña pasa nan  entrada tabata 408.703,29 florin; nan gasto tabata 410.438,20 florin, kiermen nan gastonan a surpasa nan entrada y nan tabatin un deficit alrededor di 1.735 florin.

Sra. Prince a laga sa cu esaki tabata algo cu nan tabata premira, ya cu e gastonan cu ta crece tur aña  ta e necesidad pa cuido na cas pa e pashent terminal. E gasto aki di cuido na cas ta tuma den confiscacion 44,3% di tur e gastonan cu KWF tin anualmente. Un 2% extra ta bay na gastonan na cuido na cas manera material y training.

Otro gasto grandi cu KWF na 2016 tabata e proyecto di prevencion via informacion, educacion cu a nifica un total di 23,7% di nan gastonan. Den e concepto aki ta envolvi  gastonan cu nan tin pa organisa charla, programa di TV y medionan social.

Tambe sra. Prince a referi cu e ayudo cu  nan fundacion ta duna, y muy particularmente e proyecto cu nan tin di transporte, ta gastonan cu tambe ta keda crece tur aña cu ta  nifica un 10% di nan gastonan.

Protesis
Tambe un 6% di nan gastonan ta destina pa post mastectomy. Riba e gasto aki, sra. Prince a para un rato keto pa informa cu KWF tin cuater sorto di  protesis: Un ta esun cu e ser femenino ta haya na momento cu e ta caba di opera.  E ta haya un protesis temporal y despues e pashent ta haya e protesis di silicone. Esaki ta depende di e tipo di operacion, ya cu si e mastectomy ta esun caminda nan ta kita full e pecho afo, e pashent ta haya esun temporal di silicone. Ora cu nan no ta kita e pecho full e ta haya e lumpectomy.  Tambe nan tin e protesis pa ora cu e pashent ta bay landa.

E protesis di lumpectomy y  mastectomy ta cubri pa nos seguro medico general (AZV) cu durante e ultimo 10 añanan, conhuntamente trahando cu KWF, ta provee y paga e gasto aki. El a splica cu ora cu un persona ta yega na porta di KWF, nan ta pidi su carchi di AZV y un carta di su dokter pa haya sea su protesis di lumpectomy y  mastectomy. Sra. Prince a aclaria cu e fundacion tin cu rindi cuenta na AZV pa asina e fundacion por haya e placa aki bek, ya cu e ta nifica un 6% di nan gastonan cubri pa AZV.

E gastonan final di 13,92% ta destina na e gastonan cu nan tin ora cu nan ta realisa un actividad pa recauda fondo manera nan rifa. Tambe den nan campaña di colecta fondo cu a cuminsa caba nan tin gastonan, ya cu nan tin cu provee nan boluntarionan di nan cuminda pa 12or di merdia y tambe pa ora cu nan sali, e boluntarionan por hiba algo pa nan come despues.

Otro gastonan tin di haber cu mantencion di nan sede y oficina, ya cu nan tin cu paga e servicionan basico di awa, coriente, telefon, material di limpiesa, etc.. ta gastonan cu e fundacion tin cu percura pa cubri nan, danki na e donacionnan ricibi di instancianan y henter comunidad.

Un biaha mas nos ta gradici Dios, nos ta gradici comunidad Arubano y abo cu na e momento aki ta wak e relato cu KWF  ta duna y e gastonan cu nos tin. E ta bay sigui subi”, sra Prince ta bisa.

Ya caba como 30 aña pasa caba KWF a wordo alerta cu nan gastonan ta bay subi mirando e tendencia y aumento di pashentnan victima di e malesa conoci como cancer.

You May Also Like

23Jun, JO, Bubali.JPG

Naturalesa den corte pa di dos biaha relaciona cu caso di Bubali Plas

Diaranson mainta a tuma luga e di dos caso den corte di Aruba relaciona ...

web.jpg

Cliente cu no a ricibi recibo por paga te cu dia 15

Departamento di Servicio na Cliente di WEB e dianan aki a nota cu un ...

haiti aruba ayudo.jpg

Miembronan di Cruz Cora Aruba bayendo Haiti pa duna asistencia

Marla Thiel-Dominguez y Luigi Petrocthi di Cruz Cora Aruba hunto cu marina real ta ...

insel air veredicto.jpg

Interes di InselAir ta mas importante cu esun di e trahadonan

E trahadonan cu a entama un caso contra nan dunado di trabou InselAir a ...

parkeerklem free parking

Comunidad rabia cu ponemento di klem riba dia di free parking

Pakico propaganda “free parking” mientras cu tin yen regla mara na esaki? Esaki ta ...

Ultimo grupo di studiante no por a biaha pa Hulanda ayera

Ayera e delaster grupo di studiante cu mester bay Hulanda a keda pega na ...