E mundo a caba di perde un tremendo cantante, Alberto Aguilera Valadez miho conoci como Juan Gabriel a fayece na edad di 66. Reportahe di periodista Joaquin Lopez Doriga ta confirma morto di cantante Mexicano na su cas na Santa Monica, California debi na un atake di curason. E artista legendario a caba di presenta un concierto na The Forum, Los Angeles.
Su trabao manera un productor, escritor y areglador durante e decadanan a pone den contacto cu artistanan grandi den e mundo Latino como tambe internacional. Fuera di a produci varios hit riba su mes, Juan Gabriel tambe a produci albums pa Dúrcal, Lucha Villa, Lola Beltrán y Paul Anka entre otro. Den 1984 el a produci ”Recuerdos”, Voll.II , cual a bira e album di mas exitoso den Mexico cu mas di 8 miyon copia bendi. E tambe a resalta cu un di e cancionnan di mas gusta pa su fanaticonan ”Querida” cual a keda den top di e hit charts pa mas cu 1 aña y ainda ta wordo toca 30 aña despues.
Fuente: Latin Times
