Latino America ta e unico region na mundo cu tendencia creciente di embaraso di mucha muhe menor di 15 aña, pa loke specialistanan y organismonan civil ta plantia enfrenta e problematica aki di manera urgente cu e campaña “Proteha nan awor”.

E iniciativa, cu oficialmente lo wordo lansa dia 25 di november, ta promovi pa Consorcio Latino Americano Contra Aborto Insigur (Clacai) y ta comprende e documento di ‘Lineamento pa diseño di protocol di atencion di mucha muhe y adolescentenan menor di 15 aña cu embaraso no intencional”.

Su obhetivo ta pa promove e aprobacion di politica nacional cu lo permiti e deteccion oportuno di embarasonan aki, ofrece consehonan cu apoyo clinico y psicologico, haci siguimento integral y aborda esey for di varios sector.

Ora a presenta e campaña pa prensa den un conferencia virtual, secretario ehecutivo di Clacai, Susana Chavez, diaranson ultimo a afirma cu ta plantia pa stop “di kere cu tin un naturalisacion of un deseo di e mucha muhe pa keda embarasa” y cu e relacion sexual na e edad ey tin consentimento.

“Embaraso forsa semper lo mester wordo considera como situacion excepcional”, Chavez a bisa y a enfatisa cu den casonan aki “loke ta na peliger ta e salud di e mucha muhe”.

Clacai a alerta cu e tendencia di embaraso di mucha muhe menor di 15 aña a aumenta y a wordo visualisa den contexto di e pandemia di Covid-19 y den aislamento cu esaki a provoca.

Den sentido aki, medico Mexicano Guillermo Ortiz, a informa cu su pais ta ocupa e prome luga di embaraso infantil na mundo, cu un progresivo aumento desde 2003 y cu e mayor cifra ta na estadonan como Chiapas y Veracruz, gran parti di nan tabata resultado di actonan di violencia sexual cometi pa integrantenan di e mesun famia.