Durante e ultimo añanan feminismo a mira un impulso grandi. Feminismo ta e norma cu ta busca pa hende muhe tin e mesun derechonan cu e hende homber tin a lo largo di historia.

Feminismo ta un lucha grandi cu por wordo categorisa bao di e lucha constante pa igualdad di genero. Unesco ta defini igualdad di genero como e igualdad di derechonan, responsabilidadnan y oportunidadnan di muhe, homber, mucha muhe y mucha homber.

Aunke tin avancenan importante a wordo logra den mundo, manera e derecho di voto, hende muhenan president, hendenan muhenan tumando control di empresanan grandi unda cu hende homber tabata lidera, entre otro, ainda tin hopi mas cos cu falta pa sigura igualdad di genero.

Segun datonan oficial di Nacionnan Uni (UN), e representacion di hende muhe den parlamentonan nacional ta solamente 23.7%, leu di igualdad.

UN ta indica tambe cu na nivel mundial, 150 miyon di muhe y mucha muhe a casa prome cu nan a cumpli 18 aña di edad y por lo menos 200 miyon muhe y mucha muhe na 30 pais a wordo someti na mutilacion genital femenino. Na 18 pais di mundo, e homber por prohibi su casa di traha, na 39 pais e yiu muhe no tin e mesun derecho di herencia cu e yiu homber y na 49 pais no ta existi leynan cu ta proteha e hende muhe di violencia domestico.

UNICEF ta reporta cu Latino America y Caribe ta e region unda tin mas desigualdad, discriminacion y violencia na mundo y e situacion ta afecta miyones di mucha, hoben y hende muhe. Dependiendo di e pais y region unda e victima ta biba, e experiencia ta varia y na esaki ta agrega tambe diferente factor manera algun tipo di discapacidad of si nan ta pertenece na un comunidad indigena entre otro.

“Empoderamento di mucha muhe ta e clave pa kibra e ciclo di discriminacion y violencia”. -UNICEF.

Pa medio di fortalece y arma e mucha-, hoben- y hendenan muhe cu conocemento, nos ta permiti nan tin e libertad y apoyo pa tuma nan propio decisionnan ariba nan mesun bida y actua pa haci esakinan bira realidad.

Pa logra cambionan significante pa loke ta trata desigualdad di genero, ta importante pa conscientisa, brinda e informacion necesario y realisa cu tin un problema, cu desigualdad di genero no a caba pasobra tin mas lidernan na mundo cu ta muhe. Ta importante tambe promove cambionan cu lo transforma e dinamica di poder y relacionnan desigual di genero.

LGBTIQ+

Den e ultimo añanan, e termino LGBTIQ+, Pride y e bandera di regenboog a aumenta den popularidad y sosten. LGBTIQ+ ta representa tur e personanan cu ta identifica nan mes como lesbiana, gay, bisexual y transexual, transgenero, intersexual, otro genero of cu ainda ta cuestiona nan genero. E grupo LGBTIQ+ tambe ta lucha fuertemente contra desigualdad di genero, violencia y discriminacion.

Na hopi pais rond di mundo personanan LGBTIQ+ ta wordo penalisa of cera pa motibo di nan orientacion sexual. Amnesty International ta traha for di 1991 pa e derechonan di e personanan LGBTIQ+ cu manera menciona na hopi parti di mundo no ta wordo respeta y nan ta wordo nenga nan derechonan na condicionnan di igualdad, di nan derecho di bida y libertad.

Amnesty International ta indica cu sancionnan imponi pa motibo di orientacion of identidad sexual ta varia, y na 11 pais homosexualidad lo por significa pena di morto, aunke no tur pais ta aplica esaki. Otro estadisticonan ta señala cu homosexualidad ta ilegal na mas di 70 pais rond di mundo y entre januari 2008 y september 2020 por lo menos 3.664 personanan trans a wordo asesina rond mundo.

Tin paisnan caminda homosexualidad no ta wordo penalisa legalmente, pero personanan LGBTIQ+ ta sufri diariamente formanan di discriminacion y crimennan di odio. Hopi gobernantenan politico y religioso cu ta expresa nan odio contra di e comunidad LGBTIQ+ ta promove un clima di intolerancia y discriminacion contra e comunidad aki y incluso ta promove violencia entre e personanan ey mes.

Aunke algun avance importante a wordo haci, na algun estado di Merca matrimonio di mesun sexo ta legal y na Aruba mes, union civil di mesun sexo tambe a bira legal, e lucha contra discriminacion y violencia di personanan LGBTIQ+ ta un lucha cu ta sigui fuerte.

Mas persona ta apoya e causa aki y mester remarca cu hopi celebridadnan internacional a declara nan mes LGBTIQ+ den e ultimo añanan.

LEAVE A REPLY

Please enter your comment!
Please enter your name here