Legendario musico di Aruba, Robert JeanD’or, kende a comparti estudio y escenario cu nombernan iconico den musica Latino, manera Juan Luis Guerra y Johnny Ventura, lamentablemente a fayece.

Ayera Aruba tabata di luto pa fayecimento di un di nos icononan musical y cultural di mas grandi. Robert JeanD’or tabata stima den mundo musical pa su talento y versatilidad.

JeanD’or a nace dia 10 di mei 1954 na Aruba. E tabata yiu di Francisco Reinier JeanD’or, un Curasoleño, y Cecilia Bermudez, un Arubiano.

Fuentenan local ta conta cu talento di JeanD’or a bira evidente tempo cu e tabatin apenas 5 of 6 aña di edad, ora e tabata bati man na e ritmo di e danzon Cubano. Su tata a ripara esaki y a curasha Robert pa sigui cu su interes den musica, unda el a cuminsa toca cuarta y despues guitara.

Na 1963, su ruman homber Frank a hib’e toca cu e banda local di Tanki Leendert, Blancas Palomitas. Pa cinco aña, Robert a ricibi les di canto for di Rufo Odor, y tambe a ricibi les di musica di Eddy Bennet, y a atende e Academia Musical di Aruba.

JeanD’or a bira famoso den añanan 1970 mientras e tabata forma parti di Los Juveniles hunto cu Vicente Kelly, cu Vito Oduber como manager. Cu Los Juveniles, JeanD’or a keda corona Rey di Tumba di Aruba su Carnaval tres biaha, e prome triple corona den historia di Aruba, cual tabata na 1976, 1977 y 1978. Robert despues a gana otro dos corona, na 1990 y 1991.

Den añanan 1990, artistanan di caliber mundial den escena di musica Latino tabata biniendo Aruba, y como un musico local destaca, Robert tabata toca cu nan. Asina ta con oportunidad a presenta pa e toca riba escenario internacional, ora el a uni Johnny Ventura cu Los Hijos del Rey, un grupo masha gusta na Santo Domingo na 1979. Tabata cu e grupo aki cu JeanD’or a subi escenario na Madison Square Garden na New York, cantando cinco biaha dilanti 24mil persona.

Den un entrevista cu Mario Diaz pa medionan Dominicano, Robert a recorda: “Tabata Johnny Ventura kende a papia cu mi pa mi biaha como musico pa Republica Dominicana, y mi yegada eynan a bira un gran experiencia. Unabes den capital Dominicano, e prome grabacion cu mi a haci tabata un aviso comercial, y e persona cu a yama mi pa e trabao ey tabata un señor musico hopi respeta, su nomber ta Jorge Taveras.”

Segun medionan Dominicano, pa alrededor di 1985 JeanD’or a forma un orkesta na teritorio Dominicano, participando como cantante, bajista, areglista, compositor y productor. “E semper tabata fiel na merengue y salsa,” segun Mario Diaz, cita den website Dominicano, Listin Diario. “Ta hopi posible cu, di su yegada na Republica Dominicana y sin kita su otro cualidadnan musical, e aspecto cu a duna Robert JeanD’or mas prestigio tabata su trabao den estudio di grabacion, sea participando den coro unda su voz potente y refina a destaca, dirigiendo e coristanan como tambe e solistanan, tocando bajo y areglando cantica pa diferente cantante y grupo.” El a graba den estudio na Santo Domingo, New York, Miami y Puerto Rico.

E tambe a toca cu nombernan famoso manera Willie Colon y Celia Croes, y a graba musica pa album di Juan Luis Guerra. E tambe a toca na e famoso festival Chileno, Viña del Mar, ganando e premio Antorcha de Plata cu El Conjunto Quisqueya.

Na 1990, JeanD’or a bolbe Aruba y a forma su propio grupo, cu eventualmente a bira Robert JeanD’or y Su Solo Banda Show. El a bisa cu el a tuma e decision pa bin Aruba back pasobra “tin biaha bo tera ta yama bo.”

Akinan, JeanD’or a destaca cu su grupo como e miho banda local durante Aruba Jazz & Latin Festival. El a gana e premio Den Ambiente na 1992, y a keda corona Banda di Aña varios biaha durante Carnaval di Aruba.

For di escena musical na Aruba y den exterior, cantidad di tributo a bin pa Robert JeanD’or pa su talento y habilidad, pero tambe pa su personalidad humilde y su curason generoso.

Cu Robert JeanD’or sosega na paz, y cu su leyenda nunca ser lubida.