(AP)—Leonardo DiCaprio a enfatisa diabierna anochi e importancia di crea cine y no simplemente contenido durante e Palm Springs Film Festival.
“Peliculanan ainda ta destina pa ser experencia hunto, den un cine. Awo mes, e creencia aki ta mas importante cu nunca. Pelicula original ta mas dificil pa crea y mas dificil pa protege. Pero peliculanan ainda ta importante; no contenido, sino cine. Storianan crea pa hende y destina pa ser comparti den un sala scur den un experencia colectivo,” el a bisa.
E actor di One Battle After Another a acepta e premio via un video pre-graba. Segun Variety a reporta, e no a por asisti e festival di pelicula pa motibo di e conflicto politico actual cu Venezuela, cual a resulta den cancelacion di varios vuelo for di Caribe, unda a mira e actor pasando su vakantie durante temporada di fiesta. Su coleganan, Chase Infiniti y Teyana Taylor, a acepta e premio den su nomber.
E di 37 edicion anual di International Film Awards na e festival na Palm Springs, California, ta marca e inicio di e temporada intenso di premiacion na Hollywood, honrando algun di e contendornan mas spera pa premio den industria di cine.
E anochi glamoroso tabata yen di discurso largo y sincero, cada un enfatisando e importancia di unidad entre artistanan y e necesidad di mantene naracion original y peliculanan bibo.
