Ex-vice-Consul Dominicano na Aruba, Leony Esmeralda Croes ta entre esnan acusa di ta pertenece na un red di pirateria digital cu a defrauda companianan manera Netflix y Amazon Prime Video, cu un suma calcula di mas di 20 miyon dollar, ekivalente na mas di 1.24 biyon di peso Dominicano, segun Fiscal di Distrito Nacional, Rosal Ramos.
Segun e portal di noticia Dominicano, Diario Libre, Ministerio Publico ta acusa e miembronan di e red cu ta relaciona cu otro, di ta opera un schema cu a permiti benta ilegal di acceso na mas cu 1.400 canal di television y 14 mil pelicula y serie, incluyendo contenido exclusivo di Netflix, Disney+, y Amazon Prime Video.
“E caso aki ta encera hopi mas cu $20 miyon, mirando e movemento di Bitcoin, y e caso aki ta un reto grandi pa Ministerio Publico,” asina Fiscal di Distrito Nacional a bisa despues di a bandona e Oficina di Atencion Permanente.
E portal a sigui indica cu e hues di Oficina Nacional di Asistencia Permanente di Distrito, Rigoberto Sena Ferreras, a pospone e tratamento di e peticion pa medidanan coersivo contra esnan vincula na e caso y acusa pa Ministerio Publico di labamento di placa y delitonan di high-tech te diadomingo. E peticion aki ta encera tambe declaracion di e caso compleho.
E audiencia ta programa pa 9or di mainta.
Banda di e ex-Vice-Consul, Leony Esmeralda Croes, a ser acusa tambe e siguiente persona: Raúl Ernesto Guzmán Croes; Leonardo Alberto Casci Ocumárez; Raúl Ernesto Guzmán Lora; Keomirys Torres López; y Víctor Luis Torres López.
