Ley ‘Calidad di Cuido’ ta na vigor , Por tin sancion pa negoshi of instancia cu no registra

Ya caba desde comienso di aña, Aruba ta conta cu leynan pa mehora e calidad di cuido. Esaki despues cu desde 2014, Parlamento di Aruba a vota unanimamente riba e ley di ‘Calidad di Cuido’ y e ley di ‘Profesionnan den Cuido’.  E leynan aki ta crea obligacionnan legal nobo, entre otro cu profesionalnan y instancianan di cuido medico mester registra. Sinembargo, no ta tur persona of instancia ta cumpliendo cu esaki.

Segun un comunicado di Directie Volksgezondheid (DVG), Beleidsmedewerker Uginia Poulina-Thomson, a indica cu un e-mail a wordo manda na e instancianan, pero tin di nan cu no a contesta (ainda). Den e e-mail aki tin un formulario di registracion inclui. E instancianan mester yena e formulario aki y manda esaki bek pa DVG. Hunto cu e formulario e instancianan mester manda un identificacion valido y e formulario di Camara di Comercio.

E motibonan cu un instancia no a contesta e e-mail di DVG ta posiblemente cu e persona encarga a bay cu vakantie, e e-mail adres di e instancia no ta trahando mas of a cambia di e-mail adres. Sra. Poulina-Thomson ta pidi pa e instancianan cu ta duna cuido, tuma contacto cu DVG pa asina nan por haya e formulario di registracion. “Si nan tuma contacto cu nos, nos ta manda nan e formulario di registracion y asina nan por yen’e y continua cu e proceso pa nan por registra”, sra. Poulina-Thomson a splica. E comunicado ta bisa cu aworaki DVG ta mandando un recordatorio na e instancianan di cuido unda cu varios carta di recordatorio a keda manda pidiendo nan pa tuma contacto cu DVG. Tin un fecha stipula pero despues di cada 2 siman e departamento ta mandando un e-mail di recordatorio. Tin varios instancia cu a tuma contacto cu DVG pero falta ainda hopi instancia pa registra. Personanan individual cu ta duna cuido tambe mester tuma contacto cu DVG pa asina por yena e formulario di registracion. E instancianan cu ta duna cuido ta hospital, ImSan, dokternan di cas, specialistanan, tandartsenpraktijk, boticanan etc..

E comunicado ta termina bisando cu si un negoshi of instancia no registra, esaki por tin sancion pa nan. E ley(nan) aki ta duna e inspector e autoridad cu e lo por duna un ‘last onder dwangsom’. E formulario di registracion por haya riba DVG su Facebook, pero tambe por tuma contacto cu DVG pa haya esaki via e-mail.