Ley di Reino no necesario…Pero supervision financiero si…

Cu interes nos a tuma nota di e exposicion di prof. Elzinga tocante e propuesta pa ley di Reino pa supervision financiero di Aruba, cu tin diferente punto di critica di su banda. Punto importante pa tuma na cuenta, aunke esaki no necesariamente ta conduci na apoya su opinion den tur sentido. Por ehemplo, su punto di vista cu un ley di Reino – di consenso – no ta den su concepto e manera pa impone cierto asunto como Hulanda, cu ta domina e conseho di ministro di Reino, y ta mustra algo menos di cooperacion y mas bien di imposicion. Den esey Elzinga tin razon, pero nos no ta tende pakico e asunto di Aruba su finanzas no ta algo di ‘consenso’. E motibo ta keda, y no por cambia e historia ey, cu e intervencion den finanzas di Aruba, contrario na e dos otro islanan na 2010, no a cuminza cu un ‘consenso’. Tabatin un situacion preocupante financiero na Aruba, cu pa gobierno Hulandes a yega demasiado leu y tabata motibo pa interveni, via un imposicion di supervision financiero. Gobierno di Aruba no tabata di acuerdo y a opone e medida via un decreto di Reino, pero mirando cu esey a bira inevitable, a propone pa hinca e medida, normalmente un Algemene Maatregel van Rijksbestuur (AMvR), den un ley local. Hulanda a acepta, Aruba a scapa cara y desde augustus 2015 Aruba tin su ley di supervision financiero, cu CAft como consehero di Conseho di Ministro di Reino cu, caso dado, ta conseha y propone medida pa Reino tuma pa coregi desaroyo financiero no deseable na Aruba. Es decir, ta gobierno di Reino ta supervisa y eventualmente sanciona, no CAft! Pakico esaki ta importante? Pasobra nos ta scucha hopi comentario dunando e impresion cu awor no mas, Aruba lo ta ‘perdiendo su autonomia’ pasobra cu e ley nobo gobierno di Reino ta bira e supervisor, mientras nan ta esey pa 10 aña caba. Mester stop di malinforma pueblo den e asunto aki.

Awor, por bisa cu e ley di Aruba riba su mes ta expresion di un cierto consenso, al fin y al cabo gobierno y parlamento di Aruba, via mayoria parlamentario gubernamental, a bay di acuerdo di acepta e supervision financiero – di Reino – a base di nan propio propuesta, pero cu casi mesun contenido cu e ley di supervision di e otro islanan. Pero, esey no ta kita cu si parlamento di Aruba no ta desea un ley di Reino di supervision, e asunto ta caba eynan, di forma prematuro segun cierto opinion, mientras cu otronan lo elogia esaki. Pero, esey no ta cambia nada pa loke ta e supervision cu Conseho di Ministro di Reino ta eherce riba nos finanzas publico via e ley local. Y, manera nos a yega di splica na varios ocasion, na Aruba gobierno/parlamento no por haci cambio den e ley cu ta afecta e funcionamento di e supervision, sin cu Hulanda bay di acuerdo.

Ley di Reino por tin fecha final, LAft no tin…

Un di e puntonan positivo cu e propuesta pa ley di Reino tin, ta e formulacion di un salida for di e supervision, cu di mes no por ta eterno. Nos no ta bay den detaye aki tocante e condicionnan, pero ta logico cu mehoracion adecua di nos administracion financiero lo conduci na terminacion di e supervision. Sin embargo, si no ta bay tin ley di Reino pasobra parlamento di Aruba ta rechaza e propuesta, anto nos ta cay back riba supervision via e ley local, cu no tin un forma inclui pa termina e ley. Y, manera argumenta anteriormente, Aruba no por cambia/termina e ley sin cu esun cu a impone e supervision bay di acuerdo. Esaki ta un punto importante pa cual, si nos no ta hera, e anterior gabinete cu a inicia e negociacion pa e solucion ‘hibrido’ actual, tambe a boga. Si nos keda cu e ley local, nos por deshaci di e supervision solamente via negociacion cu Hulanda, loke lo mester ta a base di e avancenan den mehoracion di nos administracion financiero gubernamental. Por ta anto cu nos ta ‘end up’ finalmente cu e mesun criterionan cu tin actualmente riba mesa den e propuesta di e ley di Reino.

Pa bolbe na e tema di consenso como base pa regula asunto via ley. Den articulo 38 di Statuut, unda ta regla e colaboracion den forma di ‘areglo mutuo’ y si ta necesario y tin consenso, via ley di Reino o un AMvR, por imagina e opinion cu e caso di Aruba realmente no ta pertenece bao di un ley di consenso. Por bisa cu e “In onderling overleg” di cual articulo 38 ta papia, no tabata exactamente e situacion na Aruba. Pero e ora mester acepta cu gobierno di Reino, si a mira necesidad di intervencion, lo mester a haci esaki a base di articulo 43, inciso 2. Esaki ta regla e derecho/obligacion di Reino pa garantiza derecho y libertadnan, seguridad legal y gobernacion adecuado. Ningun gobierno insular ta desea di keda confronta cu un medida di Reino via articulo 43 y na 2015 gobierno di Aruba, confronta caba un aña antes cu un Decreto Real cu tal medida aden, a busca un salida pa no bolbe pasa e berguenza ey.

Talvez Hulanda tambe mester ‘grow up’ y yama e cosnan na nan nomber y no sconde asunto bao di ‘consenso’ si esey no t’ey. Pero nos no ta kere cu e forzanan politico na Aruba lo keda contento cu e tipo di franqueza ey…