Cu atencion nos a tuma nota di e punto di vista di un di e exponentenan di partido Raiz, cu a publica den nos edicion di 30 di september. Un opinion interesante, pero cu finalmente no ta cambia nada na e relacionnan di poder den Reino Hulandes. Como teritorio autonomo semper lo tin e debate si e poder na nivel maximo ta bay mucho leu y ta atenta contra derecho di gobernacion autonomo di un teritorio dentro di e totalidad di Reino; un debate legitimo riba su mes, pero unda no mester perde di vista cu nos ta deliberando un asunto di imposicion di supervision financiero, cu mester a keda regla debidamente na 2015 caba; y esey no a sucede.

Pero laga nos cuminza cu duna atencion na e punto principal di critica di Carlos Guiamo, cu ta loke ta formula den articulo 38 di e ley di Reino proponi. Den e articulo aki en berdad ta pone restriccion na e accion cu gobierno y parlamento di Aruba por tuma pa haci cambio den su propio legislacion di supervision financiero; pa esey lo mester tin aprobacion di e nivel superior di gobierno di Reino. Esaki ta parce un forma por lo menos inusual di introduci facultad pa un organo di Reino den un ley local, loke ta yama e pregunta si esey ta cuadra cu Constitucion di Aruba, den cual ta supone cu ley na Aruba ta surgi como obra autonomo entre gobierno y parlamento local. Pakico causa controversia cu ‘hinca man di Reino’ den un ley local, unda supuestamente nos ta ‘autonomo’?Lamentable o no, dependiendo di punto di vista di cada ken, esaki ta un asunto di discusion ferviente cu a cuminza na 2015 mes, cu critica acerta di Raad van Advies (RvA) riba e inclusion di e supervision financiero di Reino den un ley local, loke a trece cune e anomalia di facultad di supervision di Reino den un ley local. Ni gobierno di Hulanda ni esun di Aruba a haci caso di e critica, y loke pa e otro dos islanan tabata hinca den un ley di Reino – di consenso – desde 2010, a pasa casi integralmente den e ley di Aruba (LAft).

Segun nos opinion, loke nos ta mira awor ta un continuacion di e formula inusual aki den e ley local nobo,cu mester acompaña e ley di Reino. Awor, e pregunta clave ta: pakico nos a ‘end up’ na e situacion aki? Esey tin tur cos di haci cu e lucha entre gobierno Hulandes y e gabinetenan Wever-Croes, cu tabata opone tahantemente aceptacion di un ley di Reino na lugar di e supervision, di e mesun Reino, hinca den e ley local desde 2015. Sin embargo, tabata nan propio maniobranan contra e supervision di Reino den e ley local cu a conduci na e deseo di Hulanda pa pasa e supervision pa un ley di Reino. E oposicion aki a hiba e ultimo di e dos gabinetenan menciona na proposicion di un structura ‘hibrido’, cu un ley di Reino (di consenso) y un ley local, cu cierto elemento di e supervision aden. E supuesto ‘solucion hibrido’ aki ta mustra manera un intento di fabrica un circulo cuadra cu por satisface tur e interesnan envolvi. Pakico? Pasobra a keda como punto clave pa esun mayoritariamente responsable pa supervision di Reino, gobierno Hulandes, e temor cu por cambia e ley na Aruba di forma negativo pa e supervision, a traves di simple cambio di ley segun e proceso garantiza pa Constitucion. Esey a conduci na loke nos ta mira awor, cu aceptacion di e articulo referi (38) lo significa cu atrobe ta hinca facultad di supervision, atribui na gobierno di Reino, den un ley local. Nos por bisa cu ‘in hindsight’ loke Hulanda a acepta e atardi fatal ey na 2015, tempo cu a confronta gobierno di Aruba cu e decision cu lo a bin un intervencion den finanzas di Aruba, esta pa desisti di un ley di Reino, no di consenso sino di imposicion, tabata un eror strategico. A acepta e propuesta di Aruba cu a trece e aspecto aki, ainda controversial, di inclusion di facultad di Conseho di Ministro di Reino den un ley local.

Honestamente, nos no ta mira cambio den e asunto aki, ademas cue no tin tanto relevancia, den sentido cu e no ta cambia e panorama total: lo tin un supervision financiero di tur manera, sea cu tin un ley di Reino, o un ley localmanera nos tin 10 aña caba. E ley di Aruba nobo ta nada mas cu un regalito di consuelo, banda di e ley di Reino. Ademas, e temor di Hulanda cu na Aruba por cambia algo no acorda den e ley local, actual o esun nobo, ta un peligro teorico pasobra Rey, bisa gobierno di Hulanda, tin e mecanismo hinca den e mesun Constitucion di Aruba, pa para cualkier ley o cambio di ley cu ta atenta contra interes di Reino. Y esaki a tuma lugar caba na 2019, tempo cu e anterior gobierno no a logra pa e cambio di ley drenta na vigor, cu lo a saca supervision di Reino for di e ley original. Tabata falta un firma, cu lo falta semper ora sucede cos cu no ta di agrado di e nivel superior den Reino. Por ta cu huridicamente esaki no ta e forma corecto, pero laga nos bisa cu Aruba a mustra creatividad huridico cu a yuda pa camufla, pero no ta cambia e realidad di supervision, cu lo desaparece dia nos ta regla nos asuntonan drechi.