Minister encarga cu Deporte ta admiti cu en berdad ta haci falta di inverti mas den deporte na Aruba anto cu ta algo cu nan ministerio tin na cuenta. Un ley nobo di catochi cu lo implementa pronto lo yuda aporta cu alrededor di 10 miyon florin pa deporte cual lo ta mas cu suficiente pa e siguiente decada segun e mandatario.
Minister Alex Schwengle ta bisa cu tin e suerte awo cu Lotto pa Deporte cada bes ta produciendo mas cen. E organisacion a plateau un tiki pero aworaki ta bay bin cu mas productonan den e negoshi di lotto, cual ta nifica cu nan omzet ta bay subi un poco mas. Plus e mandatario ta informa cu tin un ley di catochi na caminda. “Si e ley aki bin manera nos kier pa e bin, Lotto pa Deporte lo mester paga por lo menos un 20% di su omzet bruto pa deporte, y catochinan por lo menos 10%. ” E mandatario ta splica cu lo bay pues tin por lo menos un 10 miyon florin pa deporte cual pa e 10/15 aña venidero mester ta suficiente pa maneha deporte bon. “Specialmente si e maneho bay manera cu nos kier pa e bay unda cu ta bin mas enfoke riba inverti den profesionalidad, inverti den bon maneho general y financiero tambe. Como tambe trata di no tira placa afo, no haci inversionnan cu no tin sentido y no bin cu mucho isla riba nan mes. Trata di hustamente traha hunto y uza e forsa cu nos tin no solamente financiero pero humano tambe den un manera mas eficiente.”
Reaccion ‘PR stunt’
Algun dia pasa a sali den noticia cu Aruba ta invita e team cu a perde final di Super Bowl (futbol Mericano) di e aña aki pa bin bishita di vakantie cu tur cos paga. Esaki ta un “PR stunt” cu ATA a cualifica como exitoso y cu a produci algun critica for di e comunidad deportivo na Aruba. E reaccion negativo a mas bien bin for di deportistanan local cu ta preocupa cu fondonan cu ta haci falta pa engrandece nos deporte. Nos a puntra e mandatario tambe su comentario riba esaki: “Tin biaha bo ta wak cu partnernan normalmente no tin di haber cu un deporte. Tin biaha ta haci algo cu ta regarda cu deporte anto e ora ta bruha cosnan den otro.” E ta splica cu ora ATA haci algo e ta haci e for di su punto di bista pa promove Aruba como un producto turistico anto no deporte. “Si pa casualidad e tin di haber cu deporte, nan ta haci e. Si e tin di haber cu cultura, nan ta haci e. Pues no por tuma nan na malo tampoco di haci uzo di diferente tecnica pa promove Pais Aruba.”
Comunicacion ta laga di desea
E mandatario ta splica Bon Dia Aruba cu si e tema cu un ATA por ehempel lo kier subsidia lo tin di haber cu deporte, den un caso asina lo ta bon pa haci un ‘kortsluiting’ cu partnernan conoci, entre otro: Lotto pa Deporte, Aruba Sport Unie (ASU), Subsidiecomissie cu ta birando un fundacion, Ministerio di Deporte y mas. “E comunicacion tin biaha ta laga un tiki di desea anto eigenlijk esey ta e cos di mas lamentabel. Specialmente si ATA por ehempel tin interes di haci uzo di un parti di deporte como un tecnica di promocion, nos mester haci e.” Esaki ta algo cu a wordo haci caba den e aña Olimpico unda cu ATA tambe a contribui pa Aruba su team Olimpico por a yega Brazil. “E tabata un ‘joint effort’ entre otro departamentonan pero tambe di departamentonan di deporte.” Esaki no a bay tampoco den costonan di deporte normal na Aruba.
‘Topsport’
Minister Schwengle ta bisa cu pueblo tin rason si pasobra e enfasis semper mester ta cu tur forsa cu tin pa deporte, ta enfoca esaki claro den e pais – pero tambe enfoca aparte di e basissport y deporte organisa – pa inverti hopi tempo y placa tambe den ‘topsport’. Nan tur dos ta relata cu otro pasobra realmente ta un mundo deportivo e ta, anto e topsport ta un grupo mas chikito pero e basis mester ta hopi bon tambe pa por crea futuro atletanan cu por yega pa clasifica na Olimpiada. Y esey tambe tin su fruto pasobra e topsport ey ta trece un bon imagen pa Aruba internacionalmente cu ta bira un ‘tool’ cu por uza pa promove e pais, segun e mandatario. “Tambe pa e hubentud pasobra e hoben ta mira cu si e haci su best e tambe por yega eynan. E ta un cadena perpetua cu bo ta crea eynan den e mundo deportivo,” e minister ta bisa finalmente.
