Ley riba reparticion di ministerionan ta aproba

Ayera gobierno a introduci dos nota di cambio durante tratamento di e palabracion haci den formacion di coalicion relaciona cu e reparticion di cartera/ministerio (Landsverordening Instelling Ministeries) cual a keda aproba. Fraccion AVP a entrega dos mocion tambe ayera hunto cu un amienda cual no a ricibi sosten di fraccionnan den coalicion.

E dos mocion cu a wordo trata ayera tabata di fraccion AVP relaciona cu reapertura di refineria. Entre otro nan tabata relaciona cu e decision pa urgi gobierno pa haci tur su esfuerso pa reuni cu representantenan di Citgo na Merca y Venezuela pa cumpli cu termino di contract.

E amienda presenta ayera den parlamento tambe tabata di fraccion di AVP pa propone cu un otro minister tuma e posicion di e cartera di energia pa esaki no ta bao encargo di prome minister. Ambos mocion a keda desaproba. Fraccionnan den coalicion RED-POR-MEP tabata contra ambos mocion y tampoco a sostene e amienda.

Fraccionnan den coalicion a laga sa cu Citgo ta biniendo Aruba bek e siman cu ta bin, e negociacionnan y trabaonan ta siguiendo. Sinembargo na otro banda oposicion ta enfatisa cu nada a wordo haci den parti di reapertura di refineria recientemente. Fraccion AVP no a sostene e ley di LIM. Nan argumento ta cu e partidonan di coalicion a campaña cu nan lo bin cu shete minister y awor tin ocho pues no por tuma e ley aki na serio.

Prome minister, Evelyn Wever-Croes (MEP) ta bisa cu e critica cu a tarda tambe cu e LIM casi cinco luna tin su motibonan funda. E mandatario a splica ayera den parlamento cu gobierno a haya su mes cu asina hopi cos pa atende cu ne, cu den un situacion normal lo a pone cu si por a atende cu e ley aki den dos luna.

“Como hurista mi sa cu leynan ta necesario ora cu ta necesario. Pero na momento cu bo mester bin cu un ley pasobra bo tabata tin un gobierno sinberguensa y sin sentimento, e ta yena bo cu berguensa. Pero no tin un otro manera, it is what it is”, minister Wever-Croes a expresa.

Gobierno actual a baha e cantidad di minister na ocho anto e reparticion a haci cu e ministernan tin un pakete hopi pisa, segun premier. El a sigui den esaki nan ta traha conhunto pasobra no tur tin mesun conocemento den tur materia, pero hunto si nan por resolve y atende cu e temanan hunto. Premier a trece dilanti cu si compara nuebe minister di aña pasa cu ocho minister cu tin e aña aki, ta 20.1 miyon florin na salario gobierno ta spaar awor. “Esaki ta algo hopi importante pa tene cuenta cun’e.”

‘Mas esfuerso pa rehabilitacion di refineria’
Parlamentario Richard Arends (AVP) a haci entrega di e mocion di fraccion AVP unda ta urgi gobierno pa haci tur esfuerso pa reuni cu representantenan tanto di Citgo na Merca y Venezuela, y pa cumpli cu temanan den tempo palabra den e acuerdonan y agilisa e rehabilitacion di refineria y su operacion.

E parlamentario a laga sa ayera cu e fraccion den oposicion ta haya falta di un vision pa termino largo di cada ministerio. E ta bisa cu den pasado tabata asina cu na momento un gabinete nobo sinta, ta presenta un programa di gobernacion reparti pa ministerio, unda cada un ta trece su prioridadnan pa e proximo cuater aña. Sinembargo lo keda warda awo riba e presupuesto di 2018 cu ta spera di ricibi pronto unda por wak esaki bin dilanti.

Sr. Arends: “Mirando e emocion treci na 2016 pa e partido MEP tambe den cual a urgi pa gobierno sinta cu Citgo atrobe, nos kier reitera esaki. Na momento bo tin un partner cu ta representa un suma significante den bo economia, no solamente pa entradanan di gobierno, pero e spin-off effect cu tin, esaki ta bira imporante.

Por ta for di parlamento nos no ta mira hopi actividad pero si ta spera di mira poco mas pro actividad di parti di gobierno pa pone e empresa cumpli cu rehabilitacion di refineria den cuadro palabracionnan haci durante negociacionnan.”

Atencion na ministerio di energia
Fraccion di AVP propone ayera pa minister Glenbert Croes (MEP) of Chris Romero (MEP) cu tin experiencia den e tema di refineria cuminsa actua riba esaki. “Give Jack his jacket. Sr. Glenbert Croes a biaha bay diferente caminda y haci tambe negociacionnan. Lag’e purba haci su esfuerso. Nos por debati politicamente pero na fin di dia nos mester ta honesto cu cada ken ta haci su parti. Y dicon no por duna un persona cu dia aden y dia afo ta bezig cu esaki y cana e caminda. No ta facil pa un prome minister su so haci e trabao aki”, segun parlamentario Mike de Meza (AVP).

E parlamentario a expresa cu ora bo scucha un ‘hala di locura’ y acusacionnan, e ta bisa cu ‘Bo ta pensa e ora cu e hendenan aki no por ta serio, y tempo lo mustra di kico mi ta papia di dje.’ E partido den oposicion ta bisa cu e cuestion di gobierno keda para un banda y critica cosnan cu a pasa ayera anto cu tur cos ta malo awo, no ta e opcion.

Vak minister pa energia
Sr. de Meza a bin cu un proposicion pa laga un minister como si fuera e ta un vak minister pa concentra su mes riba e parti di energia pa trata cu topiconan y retonan sumamente grandi cu tin den e parti aki. “Mi a purba splica cu no tin ningun caminda skirbi den ningun embargo cu Citgo Aruba lo tin embargo riba dje, nos tambe a laga diferente abogado analis’e. No tin nada”, e ta bisa. E parlamentario a puntra prome minister actual si e tin esakinan den documentacion, pero ta via combersacion el a haya esaki. Premier a bolbe subraya ayera cu nan a haya e confirmacion aki for di autoridadnan Mericano directo.

De Meza: “Nos ta un gobierno anto bo mester por haya e cosnan aki por escrito pa bo analisa y wak realmente esun cu ta bisa bo ta papia cos manera cu e ta. Merca ta cumpra 60/70% di tur zeta di Venezuela, pasobra e parti ey ta carved out.” El a sigui bisa pa kico e ora gobierno no ta sinta cu Merca y Citgo anto laga Hulanda bin acerca pa wak den ki structura pone esaki pa garantisa e proyecto. “Sinta keto no ta yuda.”

 

 

You May Also Like

IMG_2184.JPG

Turista mericano haya morto den camber na Tropicana Hotel

Diamars mainta por a tuma nota di Polis na Tropicana Hotel tabata un turista ...

Kerndoelen ta trece trankilidad den Scolnan Preparatorio

Recientemente a tuma luga e seminario di kerndoelen di cual diferente scol a participa. ...

Minister de Meza ta pidi pa tene tiki pasenshi

ORANJESTAD –  Minister Mike de  Meza a referi na e rapport di Caft cu ...

9EntrevistaLisette.jpg

Lisette Gomes: “Nos ta para mesun caminda cu 6 aña pasa”

Hopi mas caso di abuso sexual ta tuma luga, cu tin registra. Esaki ta un motibo ...