Home Editorial Ley riba Serlimar ta permiti diferencia tarifa?

Ley riba Serlimar ta permiti diferencia tarifa?

573

Segun nos, no…

Nos lo por ripiti nos observacion di algun dia pasa cu ‘never a dull day in Aruba’ ta un bon descripcion di e ambiente den cual nos ta biba. E biaha aki ta e conmocion alrededor di e decision di e ministro encarga cu infrastructura y medio ambiente, cu Serlimar lo ta bay cobra proximamente pa recoge desperdicio na tur vivienda, segun un clasificacion di esunnan cu ta haya e servicio, structura segun nan entrada pa cual nan ta paga impuesto. Segun e mandatario, e tarifa ta inclui tambe un suma como compensacion pa procesa e desperdicio. Segun cu a declara, gobierno lo ta responsabel pa stipula tarifa y por lo tanto a yega na e decision di haci esaki, entrante 1 di juli proximo.

Banda di a tuma nota di tur e protestanan den tur medio di comunicacion practicamente, nos a tuma e molester pa tira un bista riba e ley bao di cual a institui Serlimar. Nos ta haciendo uso di e version riba website di gobierno mes y ta supone cu no tabatin cambio posterior den e texto di e ley aki. E articulo clave pa e discusion actual ta articulo 8. Seguidamente e traduccion literal di e articulo.

1. E Empresa (Serlimar; red.) ta impone pa cada punto di recogemento un suma pa recoge y procesa desperdicio di cas. Bao di punto di recogemento ta comprende un vivienda riba un parcela o cualkier unidad di vivienda separa riba un parcela, cu a base di derecho comercial, usufructo o un derecho personal ta habita. Tur persona riba nomber di ken e derecho comercial o usufructo, referi den e segundo frase, ta registra, ta obliga di paga e suma debi a base di e prome frase.

2. E Empresa ta impone ademas un suma pa desperdicio cu ta ser ofreci na e Empresa pa procesa.

3. E altura di e imposicionnan,na cual ta referi den inciso uno y dos, ta ser stipula pa e Empresa y por ser stipula diferente pa diferente operacion (handeling). Un aumento di un compensacion ta rekeri aprobacion di e ministro.

A continuacion nos interpretacion di loke e ley aki ta permiti y no ta permiti. Pa cuminsa, e tema di e diferenciacion di e tarifa cu e Empresa (Serlimar) por cobra pa recoge sushi na un adres. Esey no por ta mas cu un solo suma, en todo caso pa duna e mesun servicio na tur adres por igual. Segun nos opinion, ya cu den legislacion semper ley ta describi facultadnan otorga di manera limitativo, aki no tin posibilidad di introduci un sistema di tarifa diversifica pa e mesun servicio. En todo caso no sin cambia e ley, algo cu den e caso concreto aki no a ni discuti. Por lo tanto, nos no ta kere cu e Empresa, ni e ministro concerni, tin e facultad legal pa introduci sin mas, manera ta parce di ta e caso actualmente, un sistema diferencia pa e mesun servicio, esta di recoge sushi cu un container standard.

Loke si ta parce nos posibel, ta cu e Empresa ta brinda un servicio diferencia, por ehemplo ta haci uzo di un container mas chikito pa cual ta cobra menos cu e suma pa e container standard. Pero e ora ta surgi e pregunta legitimo si esey ta solamente obtenibel pa e ciudadano di cartera smal, pasobra por argumenta tambe cu un persona, o pareha, cu no ta produci tanto desperdicio, lo mester por tin acceso na e container chikito ey tambe, irespecto nan entrada.

Otro asunto ta cu Serlimar por cobra pa e desperdicio cu e cliente ta bin ofrece pa procesa. Aki e ley ta referi na desperdicio cu nos ta hiba dump. Por cobra pa esaki, pero e pregunta ta si ta sensato pa haci esey, despues di e experiencia cu e estupidez di e famoso 10 florin cu tabata cobra, cu consecuencia cu tabata bay benta sushi den mondi tur caminda, na luga di hib’e unda e ta pertenece.

Un otro aspecto ta cu en principio ta e Empresa ta stipula e suma cu e ciudadano mester paga. Ta den caso di aumento di e tarifa cu mester un aprobacion di e ministro concerni. Awor, unda ta traha conhuntamente cu e mandatario, loke ta nada otro cu practica bon gobernacion, lo tabatin consulta anto, pero no ta na e Empresa pa anuncia esaki?

Parti di e conmocion den prensa tabata tocante e incertidumbre si tur vivienda mester paga e tarifa aki, sin tuma na cuenta e adresnan cu a scoge pa laga otro compania duna nan e servicio. Asina leu cu nos conocemento y memoria ta bay, esaki tabata un issue algun aña pasa y a keda regla den e sentido cu por a notifica Serlimar di ta opta pa otro compania. Nos no ta kere cu ta necesario pa bay den un ripiticion di loke a tuma luga e tempo aya, pasobra esey lo no tin ningun sentido.

Pa resumi, nos ta kere cu e anuncio di tarifa diferencia, manera haci awor, no tin un base legal, y lo mester cana e caminda di cambio di ley. Y cu e duda cu e ‘draagvlak’ den parlamento lo tey.