(TMZ) – Si algun dia bo tabata kier haci uso di un skateboard di Tony Hawk, awo tin un opcion posibelmente miho, cu Tony Hawk su sanger den e skateboard.
E leyenda den e mundo deportivo y recreativo di Skateboarding, a lansa un liña di skateboard cu tin su sanger den e verf cu ta ser usa pa pinta e skateboardnan aki.
E ex-atleta di 53 aña a traha hunto cu Liquid Death, un compania cu ta traha awa den bleki, pa traha e skateboardnan aki y te aworaki e reaccion ta mustra cu e lo ta un exito.
Liquid Death a documenta con e proceso di traha e skateboardnan aki a bay den un video cu a ser publica riba diamars, mustrando con Hawk su sanger ta ser saca for di su man, y eventualmente ta ser basha den e verf cora cu ta ser usa pa pinta e skateboard su diseño grafico.
Liquid Death ta bisa cu e skateboard, cual tin e pintura di “It’s the Thirst Executioner”, cual ta e compania su mascota, wantando e wesonan di e cabes di un halcon (Hawk den ingles) den honor na Tony Hawk y un hacha cu sanger, ta limita na solamente 100 y actualmente ta ser bendi pa e prijs di 500 dollar pa un.
E compania di awa ta agrega cu cada skateboard lo bini cu un certificado di autenticidad, y Hawk ta declara cu e ta sumamente contento cu e resultado.
“Mi ta sumamente gradici di tin un conexion cu mi fanaticonan, y mi ta aprecia con Liquid Death ta conecta cu esun di nan,” Hawk a comenta, ken a agrega cu recientemente el a bira un promotor y embahador pa e compania.
“E colaboracion aki ta hibando e conexionnan aki na un nivel nobo, mirando cu mi literalmente mi a pone mi sanger den e skateboardnan aki.”
Hawk a continua bisando, “Y mi ta hopi orguyoso di sa cu companianan cu ta combatiendo e uso di productonan di plastic y creando parkenan di skateboarding lo ser apoya y sosteni danki na nos esfuerso.”
Hawk a revela cu un porcentahe di e ganashi genera cu e skateboardnan aki, lo bay na Hawk su The Skatepark Project y tambe e organisacion 5 Gyres, cual ta enfoka riba e medio ambiente.
