Durante e bishita oficial di delegacion Parlamentario Arubano na Hulanda y lider di fraccion AVP, Jennifer Arends-Reyes, a comparti cu Aruba tabatin e distincion di fungi como anfitrion pa Corsou y St. Maarten. E sesionnan a transcuri den un esfera constructivo y di bon hermandad.
Segun Arends-Reyes, e reunionnan Tripartite ta un plataforma crucial pa fortalece lazo di cooperacion y pa amplia comprondemento mutuo entre e tres paisnan Caribense den Reino. El a enfatisa cu e dialogo sosteni a demostra cu, mas leu cu diferencia, tur pais ta comparti un meta comun: un Reino cu ta basa riba respet, igualdad y solidaridad.
Durante e encuentro a trata e discusion di acuerdo di disputa of geschillenregeling, caminda e tres paisnan a pone enfoke riba e situacion actual y e procedura cu Aruba, Corsou y Sint Maarten lo sigui hunto durante e tratamento di Rijkswet den Tweede Kamer.
Banda di esaki, tabata un tema central e intensificacion di cooperacion regional, den un momento caminda reto global y regional ta sigui pone presion riba nos comunidadnan. Otro punto importante tabata e cooperacion na nivel di comision, cu ta busca manera pa estrecha mas e colaboracion entre comisionnan parlamentario di tur tres pais.
Arends-Reyes a expresa su satisfaccion cu e reunionnan a trece un sentimento cla di unidad y determinacion pa sigui traha hunto. Den su palabra, awor mas cu nunca e voz Caribense mester wordo fortaleci den Reino, insistiendo riba un cooperacion cu ta basa riba igualdad real y respet mutuo.
Sra Arends-Reyes a conclui cu un nota di gradicimento na e coleganan di delegacionnan di Corsou y Sint Maarten pa nan participacion y disposicion pa traha hunto, y a destaca cu e Tripartite ta sigui sirbi como un paso fundamental pa consolida relacionnan interparlamentario den Reino.
