Lider di fraccion di AVP Marlon Sneek ta mustra cu e maneho di minister Rudy Lampe pa loke ta trata enseñansa, ta sin pia ni cabes y ta causando incertidumbre riba tur nivel di enseñansa.
Fuera di problemanan cu e minister ta ocasionando pa loke ta e proyecto di traimerdia tin cantidad di otro situacionnan cu ta sigui bin dilanti den enseñansa y aki tin cu mustra cu den presupuesto 2017 pa enseñansa, a pone placa disponibel pa cuminsa un proyecto pa scolnan por haya airco.
Manera tur hende sa ya caba tin hopi scol cu ora nan a wordo renoba of a construi compleho totalmente nobo, gobierno di AVP a inclui airco den e proyectonan aki y banda di esaki gobierno hasta a cuminsa c’un programa e tempo aya pa pone solar panel riba dak di scolnan pa asina scolnan por tin fondonan adicional cu nan a spaar cu esaki, pa sigui inverti den nan mesun scol.
Awor ta bin resulta cu minister Lampe a bay traha un deal caminda e a bisa cu e ta paga e scolnan aki 30% di e airconan y tur luna e lo paga e suma cu a keda atras, pa e haci kico cu e placa aki, ningun hende sa.
Locual cu si nos ta na altura di dje ta cu e compania cu a gana e destaho aki a presenta na e scolnan aki pa kita airco bay cu nan pa motibo cu gobierno no ta pagando esakinan.
Esaki ta loke tin awendia den enseñansa aki na Aruba caminda tin 200 mil florin pa luna pa gasta den un helicopter cu no a haciendo nada y unico cos cu e a haci ta bula rond hopi abou spantando hende pero te dia di awe e no a aporta na algo drechi pa loke ta criminalidad y mucho menos pa cuida nos costanan.
Pero si gobierno ta gasta tur luna 200 mil florin den e helicopter aki anto enseñansa ta sangrando, compania ta bay scolnan pa kita airco pasobra gobierno no ta paga. Scolnan ta haya carta informando cu gobierno no ta bay paga vigilante mas cu ta otro asunto serio.
Algun dia atras tabatin un grupo di maestro, entre nan algun maestro di scol basico Washington, kendenan a bin entrega un manifiesto, ya cu nan a sinti cu nan bida ta na peliger den e situacion cu nan tin na e scol, mirando cierto situacionnan cu a presenta.
Na luga di bay duna atencion na esaki y busca un forma con pa atende cu esaki, gobierno y e minister ta bay over na kita vigilante, bisando e scolnan cu ta nan cuenta.
Awor tur hende tin carta blanco, caminda tur hende tabata sa kico ta pasando eynan, cu hendenan ta bula kibra cosnan di e sol, haciendo un desaster den cura di e scol y awor minister ta dicidi di kita tur vigilante for di tur scol y crea mesun delicado cu tabata existi den pasado.
Esaki ta di lamenta y ora cu pasa riba tur e puntonan caminda minister Lampe ta fayando, no tin otro conclusion pa saca cu e plan cu minister di enseñansa tin pa enseñansa, ta un plan macabro.
